“Main seediyan nahi char paa rahi hun. Paair mere sun pad rahein hain, aur kitne maale upar chadne padenge?” Satyajit ke maataji ne kaha apne pati se. Dono paanchwe maale kisi tarah chad kar bade se kamrein mein ek bench par bhaith jaate hain. “pata nahi kya bolenge humare bete ke baarein mein. Kitni baar bola tha Satya ko. Par kaun sune meri. Har baar kuch bhi bolo bike leke chala jata tha aur woh bhi bina helmet pehne aur ab dhekho” “Uff! Chup karogi tum. Thoda baitho tassali se. bura kyun sochti ho? acha hoga bagwan sab theek kar dega. Isse jyada hum kuch nahi kar sakte.” “ usiko ko hi yaad kar rahi hun” Satyajit ke maataji ne apne paloo se aasoon pochte hue boli. Tabhi unka bulawa aata hai. “ SATYAJIT GHATAK ?” ek aurat ne poocha. Satyajit ke maata pita aage badkar us aurat ke paas aake do kursiyon mein bhaith jaate hain. Satyajit ke pitaaji ke haath pair thande par rahe the. Woh aurat in dono ko apne chashme ko neeche karke dhekhti hai aur kehti hai. “ Satyajit ko iss baar toh bachaa liya humne par har baar mumkin nahi hopayega. Aise mein to kaksha mein daatne ka mauka nahi deta hai. He is a very well behaved boy I must say, but you see when he sits for his exams, I don’t know what the hell happens to him. Look Mr& Mrs Ghatak this is the last time we are promoting him to the next class. He needs to prove himself the next time or the last time I may say that……” phir thodi der baad woh phir bolti hai….You believe in astrology right? Ring and all! I can see you are wearing two of them, Why don’t you get one for your son….. Frankly! Mr Ghatak I don’t know. Anyways congratulations!
“Kal se tumhe Sinha ji padhaane aayenge. Tumhaare jo parikshaon ke nateeje aayein hain yeh mahodaye aasha karta hun kuch sudhaarenge. Kal shaam ko theek saath baje tayaar rahana. Aur haan Mr Satayjit amon uttom madhom porbe na jodi faaki merecho, baahut sakt kisam ke aadmi hai Sinha ji, thoda bachke rehna unse.” Satayjit ke pitaaji ne Satyajit ko naayi kaksha ke kitaabe khareedh ke dete hue kaha. Satyajit thoda muskuraya aur phir kitaabo ke panne sugne laga. Usko nayi kitaabon ke panno ki khushboo bahaut pasand thi.
Agle din shaam ko saath baje Sinha ji Satyajit ko Padhaane aayein....
Mr Sinha: Umar : paithallis, kadh: 5 foot 7 inch, Rang : kaala, Baal: Safed, ankhein: thode peele, bhawein(eyebrows) kaale aur mote. Naak: saand bhi sharma jaye. Honth: suje hue mano madhumakhi ne kaate ho. Daant: ungliyan chabane ke liye kaafi hai. Haathon mein chaar anghoothi. Kameez ke jeb mein CHARMS cigarette ka ek packet, Kaali patloon pehne hue janaab has rahe the.
Satayjit ke naye master jo shaam ko school ke baad uske ghar padhane aayein. Pehli tution class toh theek hi raha. Us din master ji ne padaya. Keh sakte hain HONEYMOON CLASS. Ek din baad dusri class thi. Sinha ji ne Satyajit se peechli class mein padaya hue paath poochein. Satyajit nahi bol paya.Usne socha isko bhi pehle kakshaon ke master jion ki tarah baataon se phusla lega. Par janab baat karne de tab na… Satyajit ke ankhein kamzor the isliye chashma pehnta tha. “Satya chashma utaaro jaldi, main nahi chahtha tumhare galtiyon ka bhugtaan tumhare pitaaji ko karna pade.” Master ji ne Charms ka cigarette khaali chai ki cup mein bhujathe hue kaha. Jyon hi Satyajit ne chashma utaar ke saamne maize par rakha tabhi usse ek zannnnnnn….. se awaaz sunnai padi aur phir uske kaan sun pad gaye aur gaal mein maano kisi ne garam koyele ke tukde mal diye hon. Ji haan bahaut jor ka ek taphad pad chukha tha. Phir taphodho ka kafila chalta raha kuch der tak Satyajit ke gaalon par.
Phir kuch din guzre Satyajit ko iske padhaane ka dhang samaj aa gaya tha. Masterji isse Physics, Chemistry aur Maths padhaate. Masterji har class mein ek ghanta marte peete aur dusre ghante mein padaate. Satyajit ko jyon ke tyon kitaab mein likha hai wohi ratna padta aur wohi agle class mein masterji ke saamne likhna padta aur ek bhi galti toh bus thapodon ka kafilla shuru.
Din guzarte gayein yeh kaafila Satyajit ke baaki shareer ke hisse mein bhi pahaunchne laga. “ oye chokre! Tu kya hai re, itna marta hun phir bhi khuch asaar nahi.? sun mere vidhyarthi aaj tak assi nabbe percent se kam parikashaon mein nahi laate. Tujhe bhi lana padega. Toh issliye sudhar jaa….” ab kaun kisse samjhaye. Satyajit itna darr gaya tha ki uske palle kuch padta hi nahi. Woh school mein bhi har kaksha mein Physics, Chemistry aur Maths ki padai karta matlab angrezi ki kaksha ho ya hindi ki kaksha, woh table ke neeche Physics ki kitaab rakhe ratta marta toh kabhi Maths practice karta. Taaki sham ko masterji ki class mein maar na khana pade… aji nateeja toh hona wahi tha Satyajit chahe jo bhi kar le.. usse school ki parikshaaon ki fikr kam shaam ki gharelu Chemistry, Physics aur Maths ki soshan ki jyada fikr thi.
Ek din masterji bole “ sun Satya tu kal se ek danda leke bhaithio ya kuch bhi. Ek kaam kar woh jo bijli chali jaati hai toh haath mein ek lakdi ka ya baans ka panka lete hain log woh leke bhaithio. Tujhe marte marte mere haath dard kar rahein hai aaj kal.” Satyajit man mein sochta kyun na ho masterji aapke maar kha kha ke mera shareer ab faulaad ka ban raha hai.. Satyajit ne jab apne pitaaji ko kaha ki yeh masterji bahaut marte hai toh pitaaji ne saaf mana kar diya “ nahi ekdum theek hai. Tujhe aise hi masterji ki zaroorat hai. Tu dande marne wale ke haath hi seedha hoga. Tujhe toh school mein jaake sunna nahi padtha, zaleel hona nahi padta, yeh sab hum dono ko sahana padta hai, Tum issi masterji ke paas padoge aur tum issi ke layak ho.”
Din ghuzar rahe the haath wala pankha Satyajit ke shareer ke wibhin jagah mein padne ke karan khuch kuch jagah tut gaya tha. Khuch mahine baad Satyajit ka janamdin aaya, ghar pe chothi si ek party thi, Satyajit ke pitaaji ne masterji ko bhi bulaya tha. Satyajit ko laga yeh baap uska asli hai? Aise koi karta hai!.... khair…janamdin mein kya hua yeh padiye “ are beta koi gana gaa de, Kishore Kumar ka.” Satyajit ne chun chun ke ROOP TERA MASTANA PYAAR MERA DEEWANA gaaya. Bus agle din tution class mein masterji ne bola “ beta Physics ke laws poochon toh yaad nahi par Kishore Kumar ke gaane tumhe bahaut yaad hai.” Ab masterrji ko kaun samjhaaye ki agar Physics ke laws ya Maths ke formula Kishore da gaate toh Satyajit ke liye baayein haath ka khel hota.
Parikshaon ke din nazdeek aa rahein the. Satyajit ab Physics, Chemistry aur Maths ki tayari kar raha tha, par janaab jab upar wala pichwaade mein marta hai toh awaaz nahi hota, Satyajit purane padaye hue cheeze bhul raha tha. Nateeja kya hua? Aji uske baarein mein baad mein bata hun. uske pehle yeh padiye: Maths ki pariksha hone ke baad ussi shaam ko masterji ne prashna patra manga ki pariksha mein kya prashna aaye the. Satya aapni school ka bag, kitabon ke panno ke beech sab jagah dhoond liya par usse prashna patra nahi mila. ab woh kya karein, masterji ko bolega toh kafila thapadon ka phir se shuru ho jayega. Satyajit pehle manzil mein rahta tha. Darwaaze ke paas waale kamrein mein masterji bhaithe hue the, usne ghar ke peeche, neeche chalang maarkar gali se hokar apne dost ke ghar gaya jo ki khuch hi duur mein tha, uska prashna patra uthaya aur wapas deewar chadkar masterji ke saamne prashna patra rakha. Uska dost bhi ussi ke school mein padta tha. Prashna patra se masterji ne kuch sawaal pooche aur kaha tu toh fail karega. Satyajit sochne laga itna mehnat kiya prashna patra laane mein aur sunne ko milta hai ki pass nahi ho payega woh. Usse laga bhagwan duniyaan mein hota hi nahi hai. Woh subha subha aagrabati jalana, shaam ko puja karna sab wairth.
Khair asli school ke nateeje nikle toh Satyajit baaki wishayon mein toh fail kiya hi par Chemistry, Physics aur Maths mein kuch jyadi hi achi tarh se fail kiya. Maths mein sau mein se sirf chauda number hi laa paaya. School ke adhyapakon ne Satyajit ke maatji ko bula bheja aur poocha “aapke bete ko kya khuch pareshaani hai, matlab humne dhekha hai ki woh chupake har ek class mein Chemistry, Physics aur Maths karta tha par phir bhi number kam aaye…... kyun? Aap uspar koi dabav wagera toh nahi daal rahe?” Satyajit ki maa ne khuch nahi kaha. Pareeksha ke nateeje dhekh kar masterji khule hue saand ki tarah lambi lambi saans lene lage aur haath waale pankhe se Satyajit ke ungliyon par teen chaar de mara, aur jisse ungliyon se khoon nikalne laga. Satyajit ke aankhon mein darad ke maarein aasoon the. Par ki farak painda! Picture toh abhi baaki thi.
Masterjee ne Satyajit ko kaha ki thand pad rahi hai, dard aur bhi hoga isiliye theek se padai kare woh. Thand aa chukhi thi Satyajit aapne aap ko puri tarah kapdon se dhak liya, yahan tak ki haathon mein dastaane bhi, taaki maar pade bhi toh dard kam ho, usne apne kalam (side burns) bhi chothe kara liye the kyunki Mr Sinha ke maarne ke anokhe tarike hothe the, kalam ke baal ko kheechna, do ungliyon ke beech pencil dabaa dena, ityaadi. Isse jyada nahi likhunga censorship ADULT certificate de degi. Khair khuch aise pal bhi hote the baahut chune hue, jahaan ki woh theek tarah se masterji ke poooche hue sawal ke uttar de pata. Un dino ko woh yeh sochta ki jawab usne apni kaabiliyat ke wajah se nahi kisi aur wajah se diya hai. Maslan sweater hari rang ki pehni ho, yah patloon kale rang ki. Jisse aage jaake yeh hua ki woh wahi sweater ya kapda teen chaar din lagaatar pehnata jis jis din shaam ko class hoti. Kabhi kabhi yeh tukke kaam bhi aa jate. Aise kai mahine guzar gaye. Satyajit ke din battar ban rahe the. Ab sweater ke rang ya patloon wale tukke bhi kaam nahi kar rahe the. Ab Satayjit ka din charya yeh hota ki
Subha school jao, phir ghar aakar khana khao, shaam ko masterjee aate bhaith te, Satyajit haath ka pankha masterji ko thamaate, phir prashno ke uttar dene mein galti hoti, masterji Charms ka cigarette chai ki khali cup mein bhujhate aur phir maarne ka episode shuru karte. Phir masterjee ke chale jaane ke baad Satyajit bister mein leta pada rahta. Maar kha kha kethak jo jata tha. Yeh pura ek saal chalta raha. Phir aagya final examination. Nateeja toh aap logo ko pata hi hai. Khair Satyajit fail kar gaya. ab usse wahi class dubara panda pada. Par ek baat yeh hua ki Satyajit ke badaulat Mr Sinha ka record aasi nabbe percent lane wala tuth gaya. Haan Satyajit ne master ka ghamand to tod diya!
Satyajit nayi saal mein. Nai vidhartiyon ke saath purani kaksha mein bhaithke phir se wahi padhai karna shuru kiya, usse baaki vidhyarti usse kabhi chidhaate toh kam baat karte aur hamesha yaad dilate ki woh dubaara ussi kaksha mein pad raha hai.. Baahut zeelat ke zindagi jee raha tha. Ab ghar mein bhi woh akela hi padta tha. Ek din ghar pe bhaithke woh padai kar raha tha ki uske haath uski purani pheechle saal ki Physics ki kaapi haath lag gayi. Usne paas pade ek kalam se kaapi mein likha CLASS - 9 SECTION - D VOLUME 1.
kuch din guzre toh kabar aayi Mr Sinha ka brain hameorage se maut ho gayi hai. Satyajit Mr Sinha ke parthav shareer ko dhekne gaya. Mr Sinha ke gharwale sab ro rahein the. Wahan ek shoke ka mahaul tha. Satyajit Sinha ji ke shareer ke paas gaya aur apni ungliyon ko Sinha ji ke naak ke paas le jaake mahsoos karna chaha ki saans toh nahi le rahe woh. Satyajit tassli kar lena chahata tha, phir woh muskuraya aur wahan se chala gaya.
P.S: This story is based upon real incidents.
