Darwaaze pe dastak hota hai “Salam saheb woh memsaahab ne bulaya tha….. "
AABIR: Bhaabhi! tumse koi milne aaya hai
Aabir Mukhopadhaya, Debdyuti Majumdar aur uski biwi Paschim Bangaal ke BALLI namak shahar mein rahte hain. Debdyuti aur Aabir dono ek prakashak sanstha mein kaam karte the. Wahan se inki dosti hui aur dono ne kuch saal baad apna ek chotha sa prakashak sanstha shuru kar liya. Shaukiya tor par Debdyuti rahasaymay ghatnao ki ghuthi suljhaate the aur Aabir issme uska sahayata karte the.
Debdyuti ki biwi darwaaze par aati hai “haan bhai aao andar aao, bagicha iss taraf hai. chappal uttarke aana. Iske pehle kahan kaam karte the?”
MAALI: yeh aas paas ke kai gharo mein kiya hain.
DEBDYUTI KI BIWI: Accha kal se aana. Mahine ke 300 rupaye dungi.
MAALI: theek hai memsaahab!
Aabir akhbaar padh rahe the aur Debdyuti daari bana rahe the….
AABIR: aare Deb! Yeh padh…. Belur Math ke Ramkrishna ke sangrahalye mein se jo Swami Vivekanand ka coat jo woh videsh jaate samay pehnte the woh chori ho gaya hai.
DEBDYUTI: hmmm! smuggler hi hoga koi jisne chori kiya hoga aur bech dega bahar kisi desh mein moti rakam par........................ Sad very Sad!
AABIR: andar ka koi aadmi toh hoga jiske saath milke smuggler ne yeh kiya hoga..... kyun?
DEBDYUTI: aur kya. Akela koi nahi kar sakta yeh sab
Tabhi darwaaze par phir se dastak hota hai……!
DEBDYUTI: arrre! Daroga saahab…. kaisa aana hua…?
DAROGA SAHAAB: bus aapke ghar chaaye peene ka man kiya issliye chala aaya….......... nahi darasal ek khoon ke silsile mein aaya hun. Aagr aapke paas samay ho toh….
Yeh sunte hi Debdyuti ki biwi rasoi se nikal ke aati hai….
DEBDYUTI KI BIWI: matlab aabhi aap log phir se shuru hogaye. Aapne toh kaha tha ki Durga Puja ke liye naye kapde khareedne jayenge? uska kya hoga?…. parso shashthi hai….
DEBDYUTI: haan haan woh bhi hoga chinta mat karo. Daroga saahab le jayenge kapde khareed wane………….. kyun?
Daroga ke taraf dekh ke muskuraate hue…
DAROGA SAHAAB: haan zaroor!
Apne paseene pochte hue
AABIR: aapko toh abhi se hi paseene aa raha hai…
DAROGA SAHAAB: nahi ye khoon ka maamla itna pechida hai ki….
DEBDYUTI: acha bataiye toh kya hua….?
DAROGA SAHAAB: Uttorpara mein ek khoon hua hai beeti raat…ek ganith ke adhyapak ka. Kisne kiya hai yeh pata lagaana hai. Do din se tehkikaat kar raha hun par kuch haath nahi lag raha hai…tohh
DEBDYUTI: aur aap yahan aa gaye chaaye peene…. Acha kahaan tak pahaunche hai is maamle par…?
DAROGA SAHAAB: is ganith ke adhaypak ke ghar par uske ilawa uska ek naukar bhi rahta tha. Matlab hai…. Toh jis raat khoon hua khooni khoon karne khidki todke aaya tha aur wahin se bhaag gaya. Darasal hamein pata chala hai postmortem ke report se ki gala dabaake hathya hui hai. Naukar khooni ko nahi dhekh paya. Usne jab kamre mein se awaaz aate suna toh kamre mein daurke gaya par tab tak khooni bhaag gaya tha, aur adhyapak marte marte cotheatre cotheatre keh raha tha...
AABIR: Cotheatre……..yeh kya shabd hai….? kisi ka naam hai. Matlab khoon karne wale ka? agar hai toh bada hi ajeeb naam hai.....
DAROGA SAHAAB: yehi to baat meri jaan khaye jaa rahi hai ki yeh bala hai kya? Kisi ka naam hai yaa kuch theatre se talook rakhta hai?
DEBDYUTI: laash ka kya hua ? Abhi bhi aap logoke paas hai yah…
DAROGA SAHAAB: haan abhi bhi aspataal mein hi hai. Aap chahe to aake ek baar dekh sakte hain?
DEBDYUTI: hmmm! Kya naam tha is adhyapak ka aur kahan padaata tha?
DAROGA SAHAAB: naam tha Harilal Chattopadhya aur Government Boys High School Uttorpara mein padaa tha. Akela tha. Shaadi nahi hui thi. Aur naukar ka naam hai Baucha. Isse jyada kuch nahi…
DEBDYUTI: hmm! Toh kal ekbaar iss school mein chalte hain wahan kuch pooch taach karunga aur phir iss laash ko dhekhne bhi jaonga….. philhaal aapko ek aur khoon ki khojbeen na karna pade issliye mujhe abhi chhorh dijiye taaki main apni biwi ko Puja ki khareedari ke liye le jaa sakun.
Daroga Saahab chalein jaate hain aur Debdyuti ek cigarette jalaate hue kursi par bhaith jaate hain.
AABIR: cotheatre.. cotheatre…. Kya ho sakta hai yeh shabd. kisi ka naam ya iss naam ka koi theatre hain yahan aas paas?
DEBDYUTI: sochna padega....
Agle din….. Government Boys High School Uttorpara ….
Debdyuti ne kuch adhyapako se poochtaach ki jo ki Harilal ke saath ussi school mein padaate the....
ADHAYAPAK 1: bahaut hi chup chap kisam ke aadmi the. Apne kaam se kaam rakhte the. Do chaar baar has liya aur bus. Kisi se jyada mel milap nahi tha unka.
ADHAYAPAK 2: ajeeb hi the. Har samay ganith ke kitaab lekar bhaithe rahte the. Khaali samay mein bhi. Chaatro ke beech kaafi naam tha. Mera matlab badnaam…
DEVDYUTI: matlab? Maarthe the?
ADHAYAPAK 2: aur kya.Thoda sa bhi galti hota toh marna peethna shuru. Kaafi baar inke khilaaf shikayaat bhi kar chuke parr… mujhe toh lagta hai kisi ladke ne hi kunnas nikaali hogi apni…
Debdyuti ne kuch chaatro se bhi poocha…
CHAATR 1: unka dehaant ho gaya?... Ek din ki chutthi bhi nahi mili.
CHAATR 2: acha hua mar gaya. ab hum log apna kamar seedha karpayenge. Iss adhyapak ke wajah se maar kha kha kar kamar tedi ho gayi thi…
Debdyuti ghar pahaunchke apne pustakalaye wale kamre mein chale jaate hain. Thodi der mein dophar ka bhojan karke sojate hain. Shaam ke chaar baje woh aspataal pahaunchte hain.
Laash ke gale par haatho ke nishaan the. Aur woh jagah neeli pad gaya thi. Debdyuti ne yeh sab dhekhkar wapas ghar laut aate hain aur Aabir daftar se...
AABIR: kuch hua uss maamle ka?
Debdyuti uske baat ko unsuna karte hue phone karte hain...
DEBDYUTI: haan. ok..... theek hai...
AABIR: kya hua?
DEBDYUTI: tu kya chai piyega ya chalega mere saath Harilal ke ghar par?
AABIR: bhaabhi ne chai ke saath pakode bhi..... accha chal chalta hoon..
BAUCHA: aaiye sahaab....
DEBDYUTI: acha yeh bataao marte samay pe kya kaha tha.... dhyan se bata na?
BAUCHA: sahaab cotheatre karke kuch badbaad rahe the.... jab main paas mein gaya tab unki aanke bahar nikali hui thi. Bade darwani lag rahi thi. Main kuch samaj paata us ke pehle hi woh mar gaye.......
DEBDYUTI: woh kya theatre wagare mein kaam karte the? Koi rangmanch dal se talookat the..?
BAUCHA: nahi sahaab woh toh bus apne kitaabo mein khoye rahte the. Unke sone ke kamre mein phone laga hua hai, raat ko baat karte the par bahaut dheere se. Phone wagera bhi shaam ko hi aate the.
DEBDYUTI: Phone wagera kiska aata tha..? kisi se kuch dushmani....? Koi aur aata tha yahan ghar pe?
BAUCHA: nahi sahaab kamra band hi rahta tha isliye suna nahi kabhi, aur ghar mein ek maali aata tha aur kabhi kabahar unke dost Ranjan da aate the. Par woh bhi kabhi kabhaar. Agar kuch paise ki zaroorat pade ya kuch aur kaam se toh...
DEBDYUTI: kahan rahte hain? Aur paise ki zaroorat....?
BAUCHA: Dum Dum mein...unhone babu ko kuch paise diye the ussi ko lekar har mahine aate the. Paisa maagne. Babu kishtoh mein paise dete the unko. Jitna mujhe pata hai…
DEBDYUTI: yahan ka phone number mil sakta hai? Kuch zaroorat pade toh phone karunga. Aur haan tum shehar ke bahaar mat jaana...
BAUCHA: jaisa aap kahe saahab. Yahan ka number hai 23372544..
DEBDYUTI: maali kab aata tha?
BAUCHA: maali hafte mein ek baar aata tha.
DEBDYUTI: jis din khoon hua tha us din koi aayatha khoon ke pehle ya baad mein?
BAUCHA: nahi sahaab!
Debdyuti aur Aabir ghar chale jaate hain. Ghar pahaunchte hi Debdyuti ki biwi kahti hai ki uske liye phone aaya tha daroga saahab ka.
Agle din...
DEBDYUTI: arre mera woh coat dena jo kal pehna hua tha.
Debdyuti ki biwi usse coat thamati hai. Aabir bhi apne kamre se nikalta hai aur bahar baithak mein aata hai…..
DEBDYUTI: hmmm! Acha theek hai. Aur kuch pata hai?..... hmm achaaa.....theek hain rakhta hun
DEBDYUTI: main bahaar jaa raha hun tu chalega..... ? Acha by the way Mr chandran ka phone aaya tha bulaya hai. Kitabon ka delivery ke silsile mein.Tu chalein jana?
AABIR: acha theek hain main chala jata hun. Tu kahan jaa raha hai....
DEBDYUTI: abhi main jaldi mein hun aake bata ta hun
Shaam ko lautkar.......
AABIR: yeh dekh Deb. Yeh chaphaa hai hamaare prakashan mein. Acha hai na? Chandran ko kaafi pasand aaya hamaare kaam ka quality.
DEBDYUTI: hmmm acha hai! Trigonometry ki kitaab. Purane din yaad aagaye. Woh formulae....
AABIR: haan yaar kya kya formulae the....
DEBDYUTI: haan Sin Theeta, Cos Theeta, Tan Theeta....
AABIR: haan phir Sec theeta, Cossec Theeta, Cot theeta...
DEBDYUTI: uff! Kya magaj mari tha inko ratt na …...hmmm
Debdyuti gusalkhana chale jaate hain nahane ke liye. Phir do minute mein gusalkhane se bahaar aakar poochte hai Aabir se.....
DEBDYUTI: arrey tune abhi kya bola Aabir...?
AABIR: kya bola? Kab?
DEBDYUTI: arre yehi Sec Theeta....
AABIR: Cosec Theeta, Cot Theeta......
DEBDYUTI: Aabir Cot Theeta ….Cot Theeta. Woh cotheatre nahi Cot Theeta hai soch..
theatre se koi talook nahi hai aur kisi ka naam bhi nahi hai..... yeh mere pehle dimag mein kyun nahi aaya. Harilal ganith ke adhyapak the. Usne marte samay khooni ko koi raaz iss parakar batake gaye honge.
AABIR: par kyun... marte samay toh ekdum asli cheez bolte hain paheli kyun bhujayega woh...
DEBDYUTI: haan paar tu bhool raha hai ki khooni Harilal ka gala dabaya hua tha aur us samay jo khoon kar raha hai uske dimag mein khuch nahi chalta sirf aapni kunnas nikalni hoti hai. Khuch aise hua hoga ki gala dabaate samay poocha hoga toh gala daba hone karan sirf yehi bol paya ho....
AABIR: hmmmm! ho sakta hai. Wah tu toh.....
DEBDYUTI: par yeh hai kya. Koi formula hai. Kya hai. Kyun bola woh...
Debdyuti table pe padi hui Trignometry ki kitaab utha ta hai aur khuch panne paltne ke baad...
DEBDYUTI: yeh dekh COT THEETA : matlab b(adjacent side) / a(opposite side). Iss right angle jo hain iss mein hai kuch. Par kya...? yeh raha is ka chitra..
AABIR: par kahan hoga yeh trikone ? Bermuda mein....
DEBDYUTI: dhekhna padega. Ek kaam karte hain kal Harilal ke ghar jaate hain. Mujhe kyun lag raha hai ki kal hi guthi sulaj jayega....
HARILAL KE GHAR AGLE DIN...
Devdyuti aur Aabir uske ghar jaate hain aur kamro mein jaakar idhar udhar cheeze ulat palat karke dhekhne lagte hain. unko woh trikon ki talash thi.Harilal ke ghar mein do bade kamre, ek rasoi ghar ek gusalkhana aur ek store ka kamra.. Aur baaki jagah mein bagicha hai. Aabir, Debdyuti aur Baucha teeno milkar pure ghar mein chhaan been shuru kar di uss trikon ko dhoondn ke liye....
DEBDYUTI: ajeeb sa hai iska makaan. Peeche ke kamre dheere dhere chothe ho jate hain. Aakhri kamra dhek Aabir.....
Phir Devdyuti bagiche mein khada hota hai aur cheekh padta hai....
DEBDYUTI: Aabir is ka ghar pura trikon aakaar mein hai yeh dekh...
Debdyuti aur Aabir dono bagiche mein khade hokar dhekte hain. Dono phir us kitab mein bane trikon wali chitra ko dhekthe hain..
DEBDYUTI: matlab is bageeche mein khuch hai. Kyunki formula ke hisaab se hypotenuse waale rekha mein kamre aur rasoi ghar hain. aakhri kamre ka deewar cone ke aakar mein hai aur gusalkhaana ke deewar ke saath mil raha hai, joki adjacent(Base) mein store ke kamre ke saath hai. Toh bacha hua opposite (perpendicular) mein yeh bagicha jahan hum khade hai toh....
Debdyuti Aabir koh yeh ek kagaaz par chitra banake samjhata hai
AABIR: hmm par hai kya issmein....
DEBDYUTI: Baucha o Baucha jara idhar aana...
BAUCHA: haan saheb
DEBDYUTI: yahan pe Harilal ne kuch rakha tha ya kuch......
BAUCHA: pata nahi saheb....
AABIR: sach bata warna....
BAUCHA: sahi keh raha hun kasam se mujhe nahi pata...
DEBDYUTI: Yeh jagah kisi se kaha kar khudhwao
Aur phir kahe anusaar woh jagah khudwaya jata hai. Iss dauraan daroga saheb ko bhi bulaya jata hai. Ek ghante khodne ke baad …..
DAROGA SAHAAB: yeh kya hai…. baksa?........ Aur issme kya hai?......... Swami Vivekanand ji ka coat. Jo chori ho gaya tha khuch din pehle.....
DEBDYUTI: hhmmmm! Chalo mera shaq theek nikla......
Aabir aur daroga sahaab Debdyuti ke taraf aascharya chakit hokar dhek rahe the...
DAROGA SAHAAB: matlab......aur khooni?
DEBDYUTI: usse kal apne ghar pe milaonga...
Agle din.....
Daroga saheb Debdyuti aur Aabir chai pee rahe the ki darwaaze par dastak hoti hai...aur darwaze kholte hi...
DEBDYUTI: yeh raha aapka khooni daroga saahab
AABIR: Maali.......
Tabhi maali bhaagne ki koshish karta hai toh usse pakad liya jaata hai...
DEBDYUTI: ab suno kya hua tha. Maine aspatal mein jab postmortem ki report dhekhi toh uske gale mein kuch aise tatwa mile jisse mujhe laga ki khuch gadbad hai. Darasal Harilal ke gale mein kuch rasayinik pradarth mile the. Usse jab jaanch karwaya toh pata chala yeh khaad mein milaaya jaata hai. Tab mera shaq uss maali par gaya. tabhi maine phone karke pata lagaya Baucha se aur uska huliye ke baarein mein poocha, yaad hai Aabir tu tab neend se utha tha aur poocha mujh se kahan jaa raha hai….usi din…phone par Baucha ne kaha… Usne kaha tha
sar pe kam baal hai
rang ghehua hai
thoda jhukke chalta hai
aur mathe pe ek choth ka nishaan hai.
Mujhe tabhi shaq hua, kyunki jab hamara maali pehle din hamaare ghar aaya tha, toh usse sheeshe se main ne daari banaate te samay dhekha tha. Uske maathe par choth ka nishaan tha.Yeh dhekho
Debdyuti ungli se ishaara maali ke taraf karte hue kaha…..
DEVDYUTI: Jab Baucha ne uska warnan diya mere dimag mein ek bijli si kaundh gayi …. par poori tarah apne aap ko tassli dene ke liye main ne Baucha se uska ghar ka pata manga. Maali ke ghar Mednipur jakar uska ek tasweer le aaya. Par hamare sarkaar ka toh daari hai. Toh jab maine kalam se tasweer par daari banaya toh ….
Debdyuti sab ke saamne table par maali ka tasweer rakhta hai. Maali ke paseene chuth jaate hain.
DEBDYUTI: iske baad main Ranjan Harilal ke dost ke ghar Dum Dum gaya. Woh ghar par nahi the. Toh maine apne dost jo wahan Dum Dum police station mein daroga hai milne gaya. Toh pata chala ki Mr Ranjan Sengupta bahaut bade aadmi hai. Do numbari ka paisa toh hai hi saath mein dusre kaam jaise smuggling bhi karte hain. Mere dost ne bola ki yeh kabhi pakda nahi jaata hai kyunki woh yeh sab apne paas nahi rakta hai. Mr Sengupta ne kaafi saare numainde paal rakhe hain jo yeh do numbari paise aur smuggle ka samaan chuphakar rakhte hain. Harilal bhi ussi mein se ek pala hua numainda tha jo ki uske khuch cheeze aur paise apne paas chuphake rakhta tha aur baad mein bahar desh nein bech deta tha…....Aur Harilal ka khoon kyun hua yeh aapko Mr Maali yani Ramcharan baateyenge.
MAALI: teen din pehle jab babu ne yani Harilal ne mujhse jab mitthi khodne ka faawda maanga toh maine kaha ki main khod deta hun toh unhone mana kar diya. Ranjan babu aur Harilal babu ki ek baar baat sun liya tha maine. Woh khuch paise ke len den ki baat kar rahe the. Aur chotha mota nahi badi len den ke baatein. Uske kai din baad jab inhone us din ye faawda manga toh mujhe shaq hua. Maine us din faawda de diya aur chala gaya. Par mere andar laalach jaag gayi aur maine inhe lootne ka man banaya. Us din dophar ko maine aakhri ghar mein kaam karke inke ghar aaya aur inko pehle dhamkaya. Jab nahi mane toh gala pakad liya inka. Mujhe lagaa ki bageeche mein hoga shayad par kitna khodta? Main akela tha. Aur itna bada bageecha. Toh maine unse paise kahan rakha hai bageeche mein poocha.
Aur is dauran maine gala dabaya hua tha …Gale mein jyada dabao hone ke karan kuch budbudaye jo ki mere samaj ke bahaar tha, aur itne mein Baucha ki aahat sunte hi main wahan se bhaag gaya...
DEBDYUTI: uske jaane ke baad jab Baucha kamre mein aaya toh usne sirf yehi suna aur woh tha cotheatre……
