JOGLEKAR KI DIARY

“Maine van ki jaali waali khidki ke bahar dhekha toh signal par do chhote bachche gaadiyon ke saamne kalabazi dhikha rahe the, unme se ek ladki apne nanhe haathon se ek phathi hui dhol baja rahi thi aur shayad uska bhai jiske shakal par ajeebo gareeb rang male hue the kalabazi kar raha tha. Logon ko apne pet paalne ke liye kya nahi karna padta… Maine khidki se nazar hatakar apne pairo ke nakhoono pe lage khoon ko dekha…..”


November 22

Kal bahut din baad dhoop nikli thi. Chhutti thi, isliye main balcony mein baithe garam garam elaichi ki chai ki chuskiyan le raha tha aur saath mein apne office ke fileon mein bhi nazar daura raha tha. Biwi maike gai hui thi isliye main apne ghar ka maalik tha. Raat ko aath baje boss ki shaadi ki saal girah ki party thi. Bahut daru pee lee thi. Ghar mein biwi nahi thi isliye socha mauke ka fayada uthaya jaye. Par baat kuch is tarah bigdi ki…. abhi tak afsos kar raha hun. Kal main nau baje boss ki party mein pahauncha. As usual boss ne yahan bhi nahi chhora mujhe. “Joglekar tum party mein bhi late aaye ho, aaj toh mujhe baksh dete?” Boss ne mujhe whiskey ka ek glass thamate hue kaha. Aaj ke baad kasam khatha hun office ki partyion mein, free ki daaru mile toh jyaada nahi peeyunga. Darsal chaar peg whiskey ke baad boss ki shirimati ji aayi mujh se milne, aur maine mazaak mein kaha “Are you sure boss ke saath aapki shaadi zabardasti nahi karwyi gayi? Aap itni badi bhool kaise kar sakti thee, and to top it all u are celebrating your twenty fifth anniversary?” Meri baat sunke boss ki shirimati ki aakhein fati ki fati reh gayi, phir unhone mazaak mein kaha “Ab kya bataun, main bhi kamsin ladki thi, inke baaton ke jhaanse mein aa gayi warna main aur inke saath shaadi…?” Unhone meri taraf aankh marte hue kaha. Mere boss ne meri taraf dhekha aur kaha” Joglekar why don’t you have your dinner and leave for your home. Biwi maike gayi hai iska matlab yeh nahi ki tum khulle saand ki tarah idhar udhar ghumo. It’s late, kal office bhi toh time se aana hai.”

November 26

Teen din se bahut busy tha, isliye likh nahi paya tumhe diary, badi ajeeb-o-gareeb samasya mein phas gaya hun. Tumhe toh pata hai ki main National Highways ke maintenance department mein hun,
taeis tarik ko boss ne mujhe apne cabin mein bulaaya, unke aankhon mein ek alag si chamak thi, dus saal ki naukri mein boss ke aankhon mein jab jab chamak dhekhi hai tab tab apne aap ko lucknow ki mashoor bhool bhoolaiya jaise jhamelein mein paya hai, main kursi mein bhaith gaya aur boss ki taraf dhekhne laga. Boss Ustaad Alla Rakkhaa ki tarah apne table par tabla bajate hue aur meri taraf dekha aur muskurate hue kaha “ Joglekar yeh file dhekho,” Maine kaapte hue hathon se file kholi, mujhe laga
party mein jo hua uske baad boss mujhe shayad termination ki chithi thama rahe the. Mere file kholte hi boss ne bola “Suno NH 12 Jabalpur se Jaipur jaane waale raste mein ek chaukaane waali baat saamne aayi hai. Dhekho hum sabko yeh pata hai ki highway pe gaariyan taye kiye hue raftaar se chalti hain, jo ki sheharon ke raaston ke raftaar se bahut zyaada hoti hai, jiske chalte chothe chothe jantu, jaise kutte, billi ya gaaye jab raasta paar karte hain toh in gaadiyon ke neeche aa jaate hain. Yeh aam baat hai, par chaukane wali baat yeh hai ki NH 12 mein yeh accidenton ke mamle kam hai, yeh ek mystery hai, matlab achi baat hai accident kam hain , par kaise? Is the thing” Boss apni pipe mein tambakoo bharte hue bole “Joglekar tumko yeh pata lagana hai, agar koi solution wahan par hai ton main chahunga yeh baaki highways par bhi lagoo karwaya jaaye” Boss ne mujhe file di aur research karne ke liye kaha. Main samajh gaya ki boss ka yeh badla lene ka style hai. Matlab kya bevakoofi hai, kutte billi kahin kam mar rahein hain toh achi baat hai, kyun kam mar rahein ab issmein research karne ka kya hai. File haath mein lekar jab cabin se bahar nikal raha tha toh boss ne peeche se bulakar kaha “Suno agar tum yeh research karne mein fail hue aur koi solution nahi nikla toh yahan ek acha sa daaru ka thekha hai, paise le jaana aur apni naukri ke khone ke dard mein daaru kareed lena ok?” Khair Jabalpur highway mere ghar se 25 kilometere ki doori par tha par chaubis ghante nigarani rakhne ke liye maine highway ke paas hi kuch dinno ke liye ek ghar kiraye pe le liya, saath mein mera ek aur sahyogi bhi tha. Do din se yahin hun.

November 27

Kya pagalpanti hai, aaj teesra din hai kuch CCTV Cameron ke saath main aur mere sahayogi kisi jantu ke marne ka intezaar kar rahe the aur phir uska kya hota hai yeh jaan-ne ke liye bhaithe hue the. Humne jagah jagah raaston mein CCTV camere laga diye the, jiske footage dhekh dhekh kar humein taye karna tha ki aakhir maajra kya hai. Khair is bevakoofiyon ke liye mera daaru peena hi shayad zimmedaar tha. Isiliye phir se daaru peene ja raha hun.

November 29

Kal subhah ki baat sochkar hi ghin si mahsoos hoti hai, kismat achi thi ya buri mujhe pata nahi. Subhah kareeb gyarah baje ek kutte ka pilla pata nahi kahan se bhatakta hua aaya aur raasta paar karne laga, maine jab monitor mein dhekha toh ek badi si truck aa rahi thi aur usne bina roke hue uss kutte ke pille ko mar diya, woh kutte ka pilla khuch door hawa mein udne ke baad rastein mein gir pada, khuch der baad ek aur gaadi aayi aur uske upar se guzar gayi. Us pille ke aantariyan pet se nikal aayi thi, yeh ghatna Jabalpur highway mein che kilometer ki doori pe ghati. Hum logo ka department accident ka akra raste mein pade shavo ke ginti se lagata hai, woh bhi jab koi hospital se khabar aaye ya kabhi kabhaar humarein department mein hi khabar aati hai ki koi kutta ya billi mara pada hai usko uthaya jaaye taaki highway par koi problem nah ho. Iss mein bhi do se teen din lag jate hain.

November 30

Woh kutte ka pilla aaj dophar tak sadak par tha, barah baje ek gaadi aake beech raaste par uss pille ke shav ke paas ruki. Main aur mera sahayogi monitor mein dhekh rahe the, gaadiyaan aas paas se guzar rahi thi, ek aadmi kareeb 50-55 saal ka apni gaadi se utra, uske gaadi ke parking lights on the. Humne gaur se dhekha yeh humaarein department se toh nahi tha… Yeh sochte sochte wah aadmi pille ke shav ko soonghne lagaa. Gaadiyon ke shav ke upar se guzarne se kuch asti panjar aur maas sahit cheez raaste mein chipak gayi thi. Uss aadmi ne apne car ke dikki se ek kurphi nikali aur usse raste pe chipke astar panjar sahit shav ko khuredh ke nikala aur shav ko raste se hata liya aur phir gaadi mein bhaith ke chala gaya. Dophar ko humne upwass rakhna theek samjha.

December 2

Aaj ek aur kutta kutte ki maut mara gaya, iss baar bhi wahi aadmi, safed cap, safed moti mooche. Ek safed t-shirt jiska colar neele rang ka tha aur trousers halke peele rang ke aur safed canvas shoes, aakar us kutte ke shav ko raaste se uthaya aur chala gaya. Mere sahayogi ne kaha “Ajeeb hai sir, yeh karta kya hai inka,?” Usne mazaak mein kaha “Tel mein fry karke khatha hoga” Maine company ki gaari lekar uska peecha kiya. Woh highway se zyada dur nahi rehta tha, yehi kareeb dus kilometer ki doori par. Uske ghar se khuch hi duri par maine apni gaadi roki. Yeh topi wale aadmi ne apni car ki dikki kholi aur ek bore se kutte ke shav ko nikal ke ghar ki taraf badha ki tabhi usne peeche meri taraf mudkar apne haath ke isshare se mujhe apne tarf bulaya. Main bhi uske saath uske ghar mein dhaakil ho gaya. Ghar kaafi saaf suthra tha, jaise koi badi hasti rahti ho. Uss topi wale aadmi ne kaha “Make yourself comfortable, kuch lenge?” Maine apni ghari dhekhi, dophar ke do baj gaye the “I know young man tumhaare lunch karne ka time ho gaya hai, toh lunch karte hain, tum khane ke saath wine lena pasand karte ho?” Maine socha phir se free ki daaru? Par yeh konsa mera boss hai, ek drink loonga aur lunch khaake chala jaonga, aise mein bhi duty par tha “Young man tum mera peecha kyun kar rahe the? Is anything wrong?” Main uss aadmi ki taraf dhekhne laga jo abhi bhi khoon se lipti hui us mare hue kutte ke shav ko lekar khada tha. Maine apni poori kahani batayi, woh zor zor se hasne laga aur kaha “Aao mere kitchen mein tumhe kuch dhikhata hun. Mujhe abhi bhi likhte hue ajeeb lag raha hai, jab main uske kitchen mein pahauncha toh us topi wale aadmi ne kutte ke shav ko oven ke paas ek bade se slab par rakha, phir cupboard se kuch teen chaar kism ke chaaku nikale. Usmein se ek chaaku se usne kutte ke dhar ko alag karke shav ko beech se kata. Mere taraf dhekhkar muskurate hue kaha . “Young man aaj hum lunch mein yahi khayenge, yeh abhi abhi mara hai toh issmein koi keere makode bhi nahi hai, do din pehle ek pille ko laya tha uspe thode kide pade hue the. Par yeh taaza hai.” Main abhi bhi taye nahi kar paa raha tha ki kya ho raha hai, main kutte ke dhar ko dhekh raha tha, uske mooh aur aankein dono marne ke baad bhi khuli hui thi. Kutte ke shareer par jo khoon tha woh sookh gaya tha, maine apni jeb se roomal nikali aur apne naak aur mooh ko dhak liya. Main zyada der wahan ruk nahi paya aur bina lunch kiye hi wahan se chala aaya.

December 3

Diary bhai aaj bahut khuch likhna hai. Aaj phir se main us topi wale aadmi ke ghar gaya tha, naukri ka sawal tha bhai, kya karoon… Khair maine uske ghar ka darwaaza khatkhataya. Uss topi waale aadmi ne darwaaza khola toh uske haath mein wine ka glass tha “Come in young man, kal tum chale gaye, are you alright….wine peeyoge?” Maine uske haath mein wine glaas ki taraf dhekha aur sochne laga ki kya guarantee hai ki yeh asli wine hai, mere peene ke baad bolega ki yeh billi ke peeshab ka paani hai, toh maine mana kar diya aur poocha “Aap aisa kyun karte hain, aap normal aadmiyon ki tarah normal khana kyun nahi khate hain?” Woh thoda muskuraye aur kaha “Tumhe mere saath lunch karna hoga toh bataunga warna nahi” mere dimaag mein turant ek idea aya aur maine kaha diya ki main vegetariyan hun, iss baat par janab ne kaha “very well I have some vegetables in the refrigerator ussi se kuch bana dunga” Meri jaan mein jaan aayi aur main unke peeche peeche unke kitchen mein gaya. Unhone refrigerator se khuch packed vegetables nikale aur mere haath mein thamakr bola “choose for yourself” kuch muliyaan thi, do teen aaloo aur khuch hari sabji.. Tabhi meri nazar in sabke packet ke expiry date par gayi… Wo sab aath mahine puraani thi. Mere kehne par usne kaha “Dhekho main sabziyaan nahi kareed ta hun, dustbin wagera se jo milta hai woh utha leta hun, matlab log jab expiry packets chahe sabzi ka ho ya biscuit ya kuch bhi dustbin mein phenkh dete hain main use istemal kar leta hun, why to waste man?” Maine phir poocha “Aap ne apne liye khaane mein kya banaya hai “Woh kal ke kutte ka ghosth thoda sa reh gaya hai hum dono ka ho jayega” Maine socha aath mahine purani sabziyaan khane se acha ek din raste mein mare hue kutte ka gosht.. aur maine phir kaha “Saath mein thodi si wine bhi loonga.”

Khair hum dono khaane bhaithe aur hamari baatchit shuru hui toh pata chala ki iss aadmi ko paison ki koi tangi nahi thi jis kaaran woh aise expiry cheezein ya raaste mein marey hue kutte billiion ke ghosht khata tha. Uska manna tha ki humlog bakri ka ya suar ka ya gaaye ka ghosht khate hai unhe maarkar, pehle unhe hari sabziyan wagera khilate hain, phir ussi ko marte hain aapne swaarth ke liye. Uska ye kehna tha ki ek samay aayega jab prithvi par sirf manav hi manav ho jayenge tab kahin bhi ghosht nahi
bachega tab bahut mushkil ho jayegi. Isliye usne taye kiya tha ki ghosht tabhi khayega jab woh jantu janwar khudh mara ho ya aacident mein maara gaya ho. Usne yeh bhi kaha use aaj tak aise mare hue jantuon se ya expiry khaano se food poisoning nahi hui. “Aur rahi baat normal ki..” usne kaha “tum logo ne apne swarth ke liye samaaj mein kuch niyam bana liye hain aur uska palan karte ho isliye woh tumhare liye normal hai. Mere liye yeh normal hai. Hum log dinnig table par bhaithe kha rahe the, saamne deewar par ek bade se sheeshe mein apne aapko khate hue dhekh kar mujhe khud par taras aane laga, main ghosht ko wine ke saath nigal gaya. Phir maine uss topi wale se ek binti ki aur kaha “But sir aapke iss tarah highway se shavo ko khane se humare liye bahut dikkate paida ho rahi hai” “Wo kaise?” “Darsal sir, woh jab bhi koi kutta ya billi accident mein mara jata hai, kisi aur ke aane se pehle aap pahaunch jaate hain, aur shav ko apne khane ke liye le jaate hain, jisse humein marne ke aakre nahi milte aur isse humarein highway management department ko lagta hai ki yahan par koi accident hota hi nahi, jo ki galat hai, aap samaj rahein hain na main kya keh raha hoon?” Mr topi waale ne muskurakar kaha “It’s your problem son not mine” Maine hatasha bhare nazar se uski taraf dhekha aur phir wahan se chala aaya.

December 4

Aaj poore din bhaith ke sochta raha ki report mein kya likhoon, boss toh samjhega nahi. Saare highways par accident ho rahein hain, ye NH 12 mein bhi hote hain, farak yeh hai ki ye bhudha topi wala kisi ke pahunchne se pehle hi wahan aake shav ko apne khane ke liye le jata hai. Mujhe koi dikkat nahi hai, dhekha jaye toh woh samaaj ke liye acha hi kar raha hai aur yeh uski zaroorat bhi hai, meri zaroorat hai meri naukri, mujhe apni biwi ka bhi khayal rakhna ha, uske zarooraton ke barein me bhi sochna hai. Bahaut soch ne ke baad maine ek upaye nikala hai aur woh yeh ki agar main iss aadmi ko maar daloon toh saare samsayon ka hal mil jayega. Phir kutte billiyon ke shav humaare department waale ko milenge jisse is NH 12 ke accident ke aakron par farak padega. Aur main apne boss ko samjha paaonga ki kutte billi jo gaariyon ke dhakke se marte hain woh har jagah aam baat hai aur iska koi solution nahi hai, isse meri naukri bhi bach jayegi…. Main kal hi iss aadmi ko maaronga….

Jabalpur Court

“Your Honour! Yeh Mr Joglekar ki last entry thi diary mein, jisse your honour saabit hota hai ki December paanch ki subha mere muakkil Mr Tyrewale ke ghar me woh khoon karne ke iraade se gaye the” Tabhi prosecution lawyer apne chair se khade hue aur kaha “Aur mazaak mein apne aap ko chaaku mar liya, aur mar gaye, is that what you want say” Defence lawyer ne kaha “ Iss par roshni dalne ke liye main apne muakkil ko kathghare par bulana chahunga.” Mr Tyrewala khatghare mein aake khade hue aur bole “Uss din subhah ke dus baj rahe the, Mr Joglekar mere ghar aaye aur meri tareef karne lage ki aap jaise agar har koi sochne lage toh samaaj ka kitna bhala hoga, he wanted to lead a life like me, I was bit confused, uske baad hum dono khane bhaithe, woh badi tezi se khana kha raha tha, I was thinking oh! man, this guy has changed so quickly, matlab mare hue jantu ke ghosht itne tastefully kha raha tha ki main impress ho gaya, thodi der mein woh utha aur bola ki woh wine leke aa raha hai. Issi dauran woh kitchen mein gaya aur chhuri lekar mere upar peeche se hamla karne laga, luckily mere dinnig table ke samne deewar par sheesha hai jismein maine isse dhekh liya, aur apne ko defend karte hue usko ussi chhuri se mar dala” Defence lawyer ne kaha “Your honour this is a case of self-defense, aur main judge sahib se darkhwast karoonga ki yeh cheez consider karte hue mere muakkil Mr Tyrewala ko baa-izzaat bari karein” Prosecution ne isse galat sabit karne ke liye kuch din ki mahaulat mangi jisse judge saheb ne maan lee aur court ko agli sunwayi ke liye sthagit kar dee. Mr. Tyrewale ko police hiraasat mein bhej diya gaya.

Mr Tyrewale ko police hathkadi pehnake court room se bahar jail le jane ke liye police van mein chadha rahe the ki kahin se ek kutiya daurti hue ayi aur Mr Tyrewale ke paairon ko apne daat aur paair ke naakhun se gaad diya, Tyrewale ki cheekh nikal gayi. Do police walon ne kisi tarah uss kutiya ko Tyrewale se alag kiya. Kuch der baad ek janwar uthane wale van mein iss kuttiya ko chadhaya gaya.

Kutiya bahut der tak van ke jaali se bahar dhekhti rahi phir usne apne paair ke naakhoono ke taraf dhekha, yeh wahi kutiya thi jiska pilla NH 12 paar karte hue mara gaya tha.

MAUM (WAX)

Aabir ne ghar ke khirki se raaste ke uspaar ek aadmi ko footpath par bhaithe hue dekha. Aabir aur Devdyuti ne jabse kalkatte mein naya ghar liya tha, tab se iss aadmi ko foothpath pe bhaithe hue paya. Bada hi dilchasp kisam ka aadmi tha. Woh apne aap ko amateur astronomer kehta tha, ek samay par sena mein tha, uske baad ghar chor diya  aur foothpath pe bhaith gaya,  sabko thoda sanki toh lagta tha yeh, par woh apne aap mein anokha tha. Uski maniye toh woh kehta tha ki prithvi ek jagah par tiki hai aur sooraj uske chaaron aur ghoom raha hai. Maano saare surya mandal ki baat hi kuch aur ho. Usne iske baarein mein kaafi kuch likha kore kaagazon mein aur phir logon ko padaya , samjhaya,….. bade ascharya ki baat hai, Koi itne confidence ke saath yeh keh sakta hai jab ki saari duniya kuch aur hi kehti hai……. Khair, tabhi darwaaze par ghanti baji. Debdyuti  Joi Baba Felunath naami film niradishak Satyajit Ray ki likhi hui detective kitaab pad rahe the, unhone kitaab ko maze par rakha aur darwaaza khola “shama chahunga ki main ne iss samay aapko pareshaan kiya” ek aadmi darwaze pe khade hokar bolne laga, Aabir jo ab bhi khirki ke paas khada tha us aadmi ki baat sunte hi deewar par tange ghardi ki taraf dhekha, shaam ke chaar baj rahe the aur chai peene ka samay ho gaya tha.  Aabir dheeme swar mein  bola  “ab bhabhi ko teen chaye banani padegi.. iss mehngai bhare zammane mein ”

“ Mera naam Ranjay hai main bou bazaar ka rehne wala hun kareeb do hafto se mere jijaaji Piyush Chakraborty lapata hai, unki koi khabar nahi hai, mere kuch doston ne aapka pata bataya. Agar aap kuch madad karein toh badi meharbaani hogi.” “Inki koi tasweer wagera hai aap ke paas…. par aap police ke paas kyun nahi gaye?” Debdyuti ne kaha, Ranjay ne apne roomal se aapna matha pochte hue dheere swar mein kaha “darhasal mere jijaaji ki bahut badi company hai kapdon ki.  Gharwaale nahi chahate ki bahar kisi ko pata chale. Ek toh rishtedaron ko pata chalega toh ajeeb sawal poochenge aur doosri baat dusre logon ka is kapdon ki mill par nazar hai. Agar unko pata chalega toh woh log kuch bhi kar sakte hai.” “tumhare jijaaji ke ghar mein aur kaun kaun hai ?” “bas mere jijaaji aur unki biwi matlab meri behan, unke maa baap bahaut pehle guzar gaye.  “Koi santaan?” “Nahi” “aap un ke ghar ka pata likh jayiye hum aaj hi unke ghar jayenge”

“ namaskaar main Debdyuti aur yeh Aabir, aapke bhai ne humein bula bheja tha aapke pati ke lapata hone par” Piyush ke patni ne in dono ko andar bhithaya  “ aap ne aakhri baar apne pati ko kab dhekha tha ghar se nikalte hue?” Debdyuti ne poocha “subha ke dus baje .  woh apne dafftar ke liye nikal rahe the.” “unka kisi ke saath koi jhagra ya koi dushmani?  “nahi aisa toh kuch nahi lagta, unhone kabhi bataya nahi, ghar par toh woh harsamay hasi mazaak karte the” “ agar aapko aitraaz nah ho toh kya hum aapke ghar ki talashi le sakte hain?” Piyush ki biwi ki anumati par Debdyuti aur Aabir ghar ki talashi shuru kar dee.  Piyush ke study room ki almaari se unhe ek bada sa peelein rang ka khaali lifafa mila, iske bare mein jab Piyush ki biwi se poocha gaya toh woh kuch nahi bata payi. Debdyuti ne woh pata padha aur uss jagah pahaunch gaya.

Madhav Mukherjee , 37 A uttor pada , kolkata – 76. “baap re baap! kaafi bada ghar hai. Kya karta hoga yeh aadmi?” tabhi Debdyuti ne kaha “ teri nazar iss bade bangle par gayi par uske aage ek bade se gate pe nahi jispe chhota sa ek board tanga hua hai - 'Astrologer'.”Aabir ka mooh khula ka khula hi raha gaya , andar jaate hi darwaze ke paas ek bail (bull) ki ek badi si sone ki murti khadi thi,  Aabir ka muh abhi bhi khula hi tha, thodi dur chalte hi deewar par do judwa bachhon ki sone ki murti tangi hui thi (twins) “kaafi shaukeen aur paise wala maloom hota hai"  Aabir ne bola, tabhi ek aadmi aya “humein Madhav Mukherjee se milna hai” “koi appointment hai aapka? woh bina appointment ke nahi miltein hain” “nahi appointment toh nahi par kuch zaroori kaam hai” us aadmi ne in dono ko bhaithak kamrein mein bhitha diya. Aabir idhar udhar chaaron aur dekh raha tha “ Aabir zara bata yeh sab jagah jagah deewaron par kis cheez ki sone ki murtiyan lagi hui hain?” “Arre yeh bhi koi poochne ki baat hai. yeh sab alag alag raashi ki murtiyan hain, ghar mein ghuste hi bail yani vrashab rashi (taurus) uske bad mithun, do Judwa bache (gemini) phir kark (cancer) phir singha (leo), phir ek sundar si kanya (virgo) uske thik baad thodi dur mein ek tarazu liye ek aadmi khada hua hai (Libra) phir is bhaithak kamrein mein us deewar par Vrischik ki sone ki murti (scorpio) phir dhanu (sagitarius) phir makar (capricon) phir is table par rakhi hui kumbha (aquarius) aur aur……” “mujhe pata hai Aabir tu kya dhoondh raha hai meen raashi (Pisces) yani machli ki moorti….par woh mujhe bhi dikhayee nahi de rahi” “aur mesh raashi  kahan hai?” Aabir ne poocha “ mesh raashi yani Aries Vrshabh rashi ke aage deewar par latki hui thi shayad aap logo ki nazar uspe padi nahi” Madhav Mukhjerjee ne haath jode kamrein mein ghuste hue kaha  “Der se aane ke liye maafi chahunga”  Madhav Mukherjee che feet lambe the. Sar pe kale safed baal, honth laal sambhavta paan khane ki wajah se, har ungli mein sone ki anguthee, safed dhoti - kurta,  pairon mein safed moje aur kale joote. “Kahiye kis kaam se aap yahan aayein hain….” “woh darhsal… yeh hai Aabir aur main hoon Debdyuti. Yeh…” “ acha aap log kuch lenge? chai wagera?” Debdyuti ne kaha “chai pee sakte hain” Debdyuti ne woh Lifafa unke samne maze par rakh diya “iss ke bare mein aap kuch keh sakte hain? Yeh lifafa humein Piyush Chakraborty ke ghar se mili, ispe aapka naam hai aur bhejhne wale koi kitaab prakashak Dhar and Sons hain.” Madhav Mukherjee chai ki chuski lete hue terdhi nazar se lifafe ki aur dhekhte hain aur plate mein rakhe buiscuit ko muh mein dalte hue kehte hain “dhekhiye yeh sach hai yeh lifafa mera hi hai darsal is prakashak se maine kuch astrology ki kitaabein mangwayi thi, toh woh kitabein issi lifafe mein parcel hoke aayi thi…..par yeh lifafa ….kya naam bataya aapne?’ “Piyush Chakraborty” “ haan uske paas kaise pahunchi mujhe nahi pata, main toh janta bhi nahi isko,  shayad bahar phek diya tha wahin se mila ho use yeh lifafa…” Debdyuti ne tasweer bhi dhikhayi par Madhav Mukherjee ne nahi pehchana.

 Aabir aur Debdyuti ne chai pee aur chalne lage ki Debdyuti ne poocha “ aapke ghar mein saare rashiyon ki murti hai par meen rashi yani pisces ki ek bhi murti nahi hai?” Madhav Mukherjee jor se haste hue bole  “baap re baap aapke observation power ki toh daat deni padegi…darhsal woh maine apne bête ko dee hai, uski raashi wahi hai na toh woh use saath London le gaya hai apne ghar mein sajane ke liye.” “aapke kitne bête hain?” “mera ek hi beta hai aur biwi guzar gayi hai , mere maa baap bhi guzar gaye hain, unka main ek hi beta tha… mera matlab.. hun, aur kuch poochna hai aapko?” Debdyuti aur Aabir wahan se nikal gaye, gate se nikalte hue Debdyuti ne mud ke ghar ko dobara dekha,  ghar ki dusri balcony mein Madhav Mukherjee ke secretary khadhe hue the. Aabir aur Debdyuti ghar aa gaye… Shaam ko Aabir ne Debdyuti ko barande mein cigarette peete hue paya toh poocha “kya hua?” “Yeh dekh, kitabon  ke naam”. Debdyuti ne Aabir ko ek parchi thamayi jispe teen kitabon ke naam likhe hue the ‘ADVANCE THEORIES ON ASTROLOGY’ ‘ ASTROLOGY AND NUMEROLOGY’ ‘WAX MODELING ’ “ Are! Baap re yeh teesri kitaab…?” “abhi thodi der pehle main us prakashak ke paas se hoke aa raha hun aur yeh dekh wax modeling ki kitaab udhaar pe le laya tere liye” Tabhi kisi ne ek patthar Aabir ki aur zor se phenka aur Aabir ki kaan ke paas se guzarte hue, pathar ne balcony ka sheesha tod diya. Debdyuti ne apne balcony se jhaak ke dhekhta ki tab tak patthar phekhne wala andhere mein gum ho chuka tha, Aabir ne dekha ki patthar pe ek kagaz lipta tha. Kagaz pe likha tha ‘Apni khair chahte ho toh yeh sab chhor do’ “Acha tune baaki do kitabein dhekhi us dukaan par?” Aabir ne poocha. “Haan prakashak ke wahan dusri copy padi hui thi, kaafi sadharan si kitabein thi, astrology par, par yeh wax modeling ki kitaab, dhek isko.” Aabir apni nazar us kitaab ke panno par daurata hai “Deb sach mein yaar saare putle ekdum asli lag rahein hai, ek baat toh hai, agar apne aankhon se nahi dhekhta iss kitaab ko toh nahi manta main.” “Kal raat ko ek baar Madhav Mukherjee ke ghar jayenge bina usse bataye uske ghar ke andar” “Par kyun tujhe koi suraag mila hai kya, koi shaq hai uspe?” “ tune gaur nahi kiya hoga, aaj jab hum log uske ghar se nikal rahe the, toh dusri balcony par uska secretary khada hua tha, us balcony par kuch kapde latak rahe the shayad sukhne ke liye, usmein ek saari bhi latak rahi thi, uske ghar mein koi aurat toh hai nahi phir,  toh….” “ tu kehna chah raha hai Madhav Mukherjee saari pehanta…””Arre! pata nahi….”

Agli raat ko….

Aabir aur Debdyuti raat ke kareeb do baje Madhav Mukherjee ke ghar deewar phand ke dusri manzil ki balcony tak pahunche. Unhe ek kamarein se kuch awaazein sunayi dee. Uss kamre ki khidki mein jhaanka to dekha ki ek aurat bister par leti hui thi, Madhav Mukherjee bhi us aurat ke saath leta hua tha, dono ke shareer mein kapde nahi the, kamrein ke andar andhera tha par ek chothi si neelein rang ki night bulb jal rahi thi, jisse Debdyuti ko andar sab nazar aa raha tha. Par ek cheez Debdyuti ko ajeeb lagi, Madhav Mukherjee usko puchkaar raha tha, hothon ko chum raha tha, uske baad dheere dheere aurat ke saare badan ko chum raha tha par us aurat ke taraf se koi harkat nahi ho rahi thi, na toh uske haath ya pair hil rahe the na gardan hil rahi tha. “Aabir ko dhekh ke Debdyuti muskuraya aur bola chalo wapas chalte hain” “ Deb thoda sa aur dhekhte hain na…” Aabir ne Debdyuti ko bolke aankh maari.  Dono wahan se wapas ghar chale gaye. “Deb mujhe toh wishwas hi nahi ho raha hai ki aise vyakti bhi hain duniyan mein jo maum ke putlo se apni zarooraton ko poora karte hain, shocking , baap re baap ghor kalyug……. par kyun yaar, koi aur ladki nahi mil sakti thi use,…. Putle se...?’" “Iss kyun ka jawab toh mere paas bhi nahi hai bhai, kyun ek aadmi che mahine ki bachhi ka balatkaar karta hai, kyun koi jaat ke naam par ek dusre ko marta hai, kyun do log ek bachche ko paida karke kisi kuredaan mein phenk dete hain, kyun koi agar kisi ke saath jhagada karein chhoti chhoti baton par toh bandooke nikal jaati hain...... Sirjee is Kyon ka pata nahi isliye woh  sab choro humein abhi Piyush Chakraborty ko dhoond nikalna hai” Debdyuti ne study table par Piyush Chakraborty ki taswer ko dhekhte hue kaha. “Par Deb Madhav Mukherjee ka maum ki putliyon se pyaar karna, aur Wax Modeling ki kitabein khareedne ka sambhandh toh samajh gaya, shayad woh tasweeron se bhi man behlata hoga. Par Piyush Chakraborty se iska kya lena dena hai?’ Debdyuti bhi soch mein pad gaya ki tabhi woh almaari ki taraf dauda, aur do kagaz ke tukre nikale. Ek par Ranjay ne Piyush Chakraborty ke ghar ka pata likha tha aur doosra wale mein dhamki bhara khat tha jo peechli raath ko balcony pe phenka gaya tha. Tabhi Aabir cheekh ke bolta hai “Deb jaldi idhar aa! yeh dhekh?” Deb ne Aabir ke haath se maum ke putlon par kitaab liya aur Piyush Chakraborty ki tasweer dekhi. “Dekho kaando! Eta ki… yeh Piyush Chakraborty ki asli tasweer nahi hai yeh bhi ek maum ke putle ki tasweer hai, uff! Hum kitna kam jante hain, ek nazar mein dekho yeh tasweer kitni asli lagti hai. Ab toh Ranjay ko pakadna padega kal subah tadke tadke”. “Par Deb Ranjay milega kahan?” Pata lagana padega ... Madhav Mukherjee ke ghar chaltein hain thoda dhamkaunga toh kuch toh bolega”

“Madhav Mukherjee se milne aayein hai zara bula dijiye?” Debdyuti ne kaha “woh aapse mil nahi payenge. Woh kisi zaroori kaam se kal subah dilli chale gaye”Secretary ne kaha “dhekho jhooth mat bolo mujhe pata hai woh yahi hai, tum nahi bulaoge toh majbooran mujhe police bulani padegi  “thodi der mein Madhav Mukherjee aa gaye. Debdyuti ne wax modeling ki kitaab, Piyush Chakraborty ki tasweer aur woh peela lifafa maze par rakha “Aap kuch bolenge ya main police se bulwaaun?” Madhav Mukherjee apne sofe pe bhaithe “ woh mujhe maum ke putle …..” “Woh baat humein pata hai ki aap maum ke putlon se kya karte hain par yeh lifafa aur tasweer wali baat kya hai. Pehle aap se Ranjay ke baarein mein poochna chahunga. “ Darhsal woh Ranjay nahi khud Piyush Chakrabory hai aur usse main bahaut dino se janta hun. Woh mera client hai usko main jyotish sahstra se samasyaon ke hal batata hun, aise hi ek din woh mere ghar aaya bina kisi appointment ke, usko kuch zaroori  baat karni thi par uss samay main apne putle wale kamrein mein tha aur woh wahan aa gaya mujhe dhoondte hue, jab usne mujhe putlon ke saath….  mera matlab….. woh sab karte hue dhekha toh woh do minute ke liye wahi khada ghoorta raha. Maine jab yeh sab dhekha toh main kamrein ke bahaar aya tab tak woh jaa chukka tha. Ussi raat usne mujhe phone karke blackmail kiya. Uss din aapne mujse poocha tha ki meen rashi yani pisces ki sone ki murti nazar nahi aa rahi, maine woh murti Piyush Chakraborty ko us peele wale lifafe mein bhandhke dee thee jo ab aapke paas hai, yeh blackmail wali cheez bahaut din aur chali, phir ek din maine tang aakar usse kuch aur dene se mana kardiya.

Bas phir kya tha, usne mujhe dhamki di ki woh mujhe phasa dega. Us din jab aap log aaye tabhi main samaj gaya tha par jab aapne us din mujhe tasweer dhikhayi toh main todha soch mein pad gaya ki ek toh yeh tasweer Piyush Chakraborty ki nahi thee aur doosri baat yeh tasweer ek mom ke putle ki thi, par camera ki chaturai se aise khichi gayi hai ki koi pakad nahi payega aasani se ki yeh tasweer mom ke pootle ka hai ya kisi asli insaan ka. Main jaan gaya tha kyunki maum ke putlon ke baarein mein mujhe pata hai” “Ranjay yani Piyush Chakraborty abhi kahan milenge?’ “Jahan se shayad aapko ye lifafa mila tha wahin”. “Dhanyawaad” kehkar Debdyuti aur Aabir wahan se chale gaye. Woh log Ranjay yani Piyush Chakraborty ke ghar pahaunche. Piyush Chakraborty ki patni ne darwaaza khola aur khuch bolne se pehle hi Debdyuti aur Aabir ghar mein ghus gaye. Tabhi Piyush Chakraborty bathroom se nahake bahar aa rahe the aur inn dono ko dhekhte hi bhaagne ki koshish karne lage, ki tabhi police wahan pahunch gayi aur Piyush Chakraborty ko daboch liya. “Bhabhi ji chai banaiye,  aapke pati humein  kuch kehna chahte hain. Toh boliye janab, yaar bade bevakoof ho ?,Usdin apne ghar ka pata aur dhamki waali chithi dono ek hi handwriting mein likh diya, dhamki waale kagaaz toh kisi aur se likhwa liya hota, acha yeh maum waale putle bante kahan hain aur tumhe yeh  kaise pata chala? “Woh jab Madhav Mukherjee ne khuch dene se mana kar diya toh maine ek plan banaya, mujhe jis lifaafe mein murti di gayi thi main us prakashak ke paas gaya ki koi kitaab ho jismein maum ke putlon ke baarein pata chale, toh wahan se WAX MODELS AND MANNEQUINS kitaab mein ek company ka pata diya hua tha jo Pakstreet mein hai. Bas wahin jaake ek aise hi kisi putle ko khareeda aur usko ghar le aaya, phir ek tasweer kheechne wale ko bulakar ek tasweer kichi aur aapke paas le gaya, jab aap ko bhi woh tasweer mein putla samaj nahi aaya main bahaut khush hua,” “par tu humaare paas aaya kyun?” “main chahata tha agar apke taraf se Madhav Mukherjee ko poochtach karwayi jaaye toh woh kuch jyada hi dar jayega, police se karwata  toh shayad main bhi phas jata, woh ghar par lifaafa bhi mane janboojhke almaari mein rakha tha ki agar aap logo ne talashi li toh Madhav Mukherjee ka pata us lifafe par paate hi uske ghar jayenge” “very smart…aur dhamki wali chithhi kyun beji mujhe,?” “woh darhsal jis din aap log Madhav Mukherjee ke ghar gaye the us din shaam ko uska mere paas phone aaya tha, bechara girgira raha tha, usne meri sharte man li ki woh phir se mujhe cheeze dega jo main chahunga. Isliye case band karne ke liye main woh pathar mein lipti hui kagaz aapke sheeshe par maari thi.” “Chalo ab police tumhein jail mein pathar tudwaigi.

Debdyuti aur Aabir ghar laut rahe the ki Aabir ki nazar phir se us raaste par bhaithe amateur astronomer par gaya “Deb ek yeh hai jo saare zamane se lad raha hai ki sooraj ghoom raha hai aur prithvi ek jagah khadi hui hai, use kisi ka dar nahi, aur doosri taraf woh paise wala astrologer  hai jo ki dar gaya tha ki maum ke putlein waali baat bahar kisi ko pata chal gaya toh uski badnami hogi. Uske client chale jayenge. Paise nahi rahenge…issi chakkar mein phas gaya. Sochta hun agar yeh putlein waali harkhat iss amateur astronomer ne kee hoti aur Sooraj ghoom raha hai, prithvi ek jagah hai wali baat agar Madhav Mukherjee ne kahi hoti to…….

UMEED

“Bahar kahan jaa raha itni garmi mein?” Rajan ne Gopi se poochha. “ Kahin nahi,
garmi toh andar bhi hai, bhai, bahar jake thoda paseene bahaunga aur phir kamre mein
aake phankhe ki hawa mein bhaithunga, tab jaake thandi hawa khane ko milegi…”
Uff! tera kya hoga, Gopi” Rajan apna sar peet-ta hua chala gaya. Gopi sabzi mandi
se alu khareedke laya tha. Alun o ko ubalne ke liye stove par chadha ke nahane chala
gaya..Gopi apna guzaara samose aur chaaye bechke karta tha. Woh Paschim Bangaal
mein Murshidabad ka rehne wala tha. Har subhah chhe baje uth jata, phir naha dhoke
puja paath karta, phir samose ke liye maida goonthta. Kareeb barah baje saare samose
lekar alag alag halwai ke paas jaata aur samose bech aata aur bache hue samose apne ek
chothe se dukaan mein rakta grahako ko bechne ke liye. “ Arre! Gopi bhai dhekho kiski
tasweer chhapi hai!!” Mohalle ka chhokra haath mein hindi film ka poster lekar daudta
hua Gopi ke kamrein mein aya. Gopi ne poster haath mein liya. Usmein bade bade film
sitaron ke beech ek aur ladke ki tasweer bhi thi…………….
______________________________________________________________________

“Oye Raghu! ek baat bata, tu har din mujhse do rupaye leke railway station ki taraf kyun
bhaag jata hai?” Raghu ne thoda muskurake almaari se ek kitaab nikala aur usse hawa
mein palat diya. Kitaab se dher saare wajan machine ke ticktein palang par faail gaye.
Gopi ne un ticketon ko uthaya “ Abey Bevakoof! Yeh do rupaye se tu har din railway
station apna wazan naapne jata hai?” “Nahi pitaaji, wajan toh ek bahana hai, main to alag
alag din wajan wale ticktaon mein aalg alag film sitaron ke tasweer chapte hain unko
jama karne ke liye jata hun”
______________________________________________________________________

Gopi uss film ke poster ko ek haath aur dusre mein samose se bhari tokri lekar apne
kamrein se nikal pada. Samose wagera bechke weh apne dukaan mein gaya aur deewar
par tangi hui Rajnikant ke poster ko utaar ke yeh wala poster laga liya. Shaam ko jab woh
ghar gaya to pados ki Raanu ki maa, Gopi ke ghar ayin “ Arre Gopi bhaiya, aapke paas
bees logo ke liye khana banane ke liye kadhai mil jayegi ?” “ Namaste bhabhi….haan
shayad padi ho, par dhoondhna padega, kal tak dun to chalega?” Raanu ki maa ne haan
bhari aur chali gayi. Gopi ne ek bidi jalaayi aur transistor chalu karte hue dusre ek chothe
se kamrein mein jakar khadahi dhoondne laga.
______________________________________________________________________

“ Arre…. tu Gopi ka beta hai na? Yeh ghoothne mein choth kaise lagi…?” “Dactar saheb
yeh Raghu, picture dhekhne ke liye uss cinema hall ke deewar ko taapne gaya tha aur
gir gaya……” Raghu ke dost ne doctor ko bataya, “ Dactor sahib, pitaaji ko mat batana
warna woh pata nahi kya karenge” Raghu ne rote hue kaha. Doctor saheb ne zakhm
dekha aur kaha “ Par ispe to taanke lagane padenge warna thik nahi hoga” Raghu ghabra
gaya aur wahan se bhagna chaha.. Doctor aur uske dost ne usse pakda aur phir usse ek
behoshi ka tikka laga diya.

Jab Raghu ko hosh aaya toh usne apne aap ko ghar mein leta hua paya, Gopi paas mein
bhaitha hua tha “ Ab kaisi tabiyat hai beta?” Raghu ne apne ghoothno ki taraf dhekha toh
taanke pade hue the “ Ab thoda sa thik hun pitaaji par….” “ Mujhe dactar babu ne sab
bata diya hai…… Koi baat nahi, agli baar se seedi le jaana deewar taapne ke liye” Yeh

kehkar Gopi ne Raghu ko ek khilone wala camera diya. Raghu bahaut khush hua. Woh
ek aankh band karke camera ke andar dhekhne laga. Uss camera ke andar alag alag film
staron ke tasweerein thi, Raghu har baar button dabata aur camera usse ek alag film star
ki tasweer dhikha tee.

________________________________________________________________________

Gopi ko woh khilone wala camera bartano ki bori mein se mili. Camere ko usne ek
chothe se jhole mein rakh diya. Saath mein woh wajan wale ticktein bhi us jhole me daal
dee.

AGLE DIN DUKAAN PAR…..

“Arre samose kaise diye?” “cheh rupaye” “Che rupaye ka samosa? Par samose toh pehle
aap chaar rupaye ka bechte the?” “Haan, aaj se daam bada diye hain” Grahak ne thoda
muh latkaya aur phir khuch sochke samose khareed liye. Tabhi Raghu ka dost dukaan ke
raaste se guzar raha tha “ Namaste Gopi chacha…..are yeh poster mein Raghu…tabhi
ek bike ne aakar Raghu ke dost ko mar diya, wahan pe log jama ho gaye aur bike wali
ki khoob pitaayi ki, Raghu ke dost ko aspataal le gayein, Gopi bhi saath mein gaya.
Wahan pe Raghu ke dost ko kuch der baad hosh aaya aur usne Gopi se poocha “ are aap
yahan.. mere pitaaji ko toh pata nahi ki mera accident hua hai…?”Gopi ne muskurakar
kaha “haan bataya hai par koi pareshaani waali baat nayi hai beta jyada gehri choth bhi
nahi aayi hai” Tabhi Raghu ke dost ki maa daurti hui aspatal ke kamrein mein ayin,
uske baaki parijan bhi aaye hue the, yeh sab dhekh ke Gopi wahan se chala aya. Gopi
jab wapas apne dukaan aya toh Rajan ko khadha hua paya” “ Oye! maine suna samose
ke bhav tune badha diye hain? Chaar rupaye se cheh rupaye kar diye hain, kyun bhai?
Samose par se kya sarkar ne subsidy hata dee hain ?” Gopi thoda muskurake bola “ nahi
yaar jyada paise kamane hain, Bambai jo jana hai?” “ Kyun bhai Murshidabad mein
jagah kya kam pad gayi hai? Bambai kyun jayega, suna hai achi jagah nahi hai….bahaut
paisa hai….kido makode ki tarah log chalte rahte hain bus apna dana jugaad karne ke
liye, mat jaa” Rajan ek samosa apne muh mein dalte hue kaha. Gopi thoda muskuraya
aur kaha “ khuch kaam hai, waqt aane par bataunga” “ Arre! Gopi is poster mein Raghu
ki tasweer malum padti hai par…” Tabhi Gopi apne haath ka ishaara karte hue Rajan ko
rokta hai “ mujhe pata hai tu kya bolega par abhi ruk jaa samay aane par sab batuanga.”

DO MAHINE BAAD

“Are namaste TT saheb kaise hain” “ bhalo bhalo tumi bolo?” “ Bus saheb bambai jane
ki tayari kar raha hun…acha yahan se Bambai jane ki train ka kiraya kitna hoga?” “ yehi
kareeb aathso rupaye….” “ ek ticket karwa denge parson ka?” “ kara dunga pehle samose
toh khilao? Par bambai kyun, ab tum bhi jaoge …?” Gopi ne muskurate hue ek plate
mein do samose diye.Gopi shaam ko ghar aaya aur samaan wagera rakhne ke liye apne
almari ke upar rakhe hue bakse ko utarne ke liye stool par chadha…


“Raghu beta yeh kheer chakh ke to dhekh kaisi bani hai?” “ Pitaaji bahaut achi hai par
meetha thoda kam hai, par aaj kya hai pitaaji.?” Gopi muskurakar bole “Aaj kisi ka
janamdin hai”. Raghu soch mein pad gaya “Amitabh Bachchan ka janamdin hai” “Arre
haan main toh bhul hi gaya tha. Toh phir issi kushi mein mujhe ek tofa chahiye!” “ Kya
chahiye?” Raghu ne thoda socha aur phir kaha “woh jo picture thi na ‘Deewaar’ usmein
jo Amitabh ne kalai par ….” “ Meera baap chor hai likha tha woh likha hua chaiye
tujhe?” kamar par haath rakhe Gopi ne kaha , tabhi Raghu ne sar hilate hue kaha “ Arre!
puri baat toh suno, usne jo kalai par ghadi pehni thi us tarah ki ek ghadi chahiye” “Toh
beta, tu kalai par ‘mera baap chor hai’ hi likh daal. Woh mere liye sasta padega.” Raghu
ne waisi hi ek hubabu sasti ghadi, chor bazaar se khareed lee aur Gopi ko dhikhate hue
bola “ Woh kya kehte hain angrezi mein…. Thank you” Gopi bada khush hua. Raghu
apne kalai mein woh ghari bhandhke sheeshe ke saamne khare hokar, kamar mein haath
rakh kar bolta hai “ AAJ KHUSH TOH BAHAUT HOGE TUM….HAINNNN?”
______________________________________________________________________

Gopi weh ghadi apni kalai pe bandhke, baar baar dhekh raha tha. Gopi ko woh ghadi
apne bakse se mili thi. Usne woh ghadi bhi us chote se jhole mein rakh lee. “Are Gopi
bhaiya yeh lo, TT saheb ne aapki train ki ticket bheji hai,” Gopi ne ticket lete hue aathso
rupaye thama diye. Gopi agle din shaam ko train mein bhaith gaya.

“ Pitaaji main Bambai jana chahta hun. Mujhe yahan nahi rehna, mujhe filmon mein
kaam karna hai” “ Par beta……” “ Nahi pitaaji, mujhe yahan rehkar samose nahi banana,
main chahta hun ki main Bambai jaaon aur phir khuch kaam lag jaaye toh aapko bhi bula
lun” “Main kahin nahi jaonga, tujhe jana hai toh jaa” tabhi paas waali line se dusri train
tez raftaar se guzarti hai aur Gopi apne neend se jag jata hai, “ticket dhikhayiye janab?”
Ticket nikalte hue Gopi ki jeb se uske bete Raghu ki tasweer neeche zameen par gir gayi.
Jaise wo tasveer uthane gaya, TT mahodaye pooch bhaithe “ Arre! aap inhe pehchante
hain? Yeh toh bahaut bade kalakaar hain?” “ Haan darsal……”

“ Hello? Is this 41732178?” “ Haan boliye” “ Main Cinefair ki Editor Chitrangada
bol rahi hun. Mr Sayan Dabolkar se baat ho sakti hai?” Thodi der baad film abhineta
Sayan Dabolkar phone uthate hain “ Ji kahiye?......... Kya Murshidabad…nahi toh …aji
aaj tak paschim bangaal gaya nahi, Murshidabaad toh dur ki baat hai,….. kya train
accident?...........toh main kya karoon kisi ke jeb se meri tasweer nikli hai toh?........nahi
nahi main kuch nahi kar sakta. Thodi der mein Gopi ke dost Ranjan ko is train ke
durghatna ke bare mein pata chala. Woh daurta hua Murshidabaad railway station
pahuncha “Saaab Gopi Saha ke naam se koi hai? Sahaab bataiyena?” Station master
sabko pooch taach waale kamre mein bhej rahe the. Wahan pata chala ki ek train jahan
duurghatna hui thee, wahan jane wali thee. Rajan dhurghatna stal pahuncha. Wahan har
taraf laashein padi hui thi. Ek jagah sab samaan wagera pade hue the, Rajan ne shav
dhoondhne ke liye har ek laash par se kapada hatane laga. Thodi der mein woh thak ke
bhaith gaya. Khuch der baad usse durr ek laash padi hui mili jisne ek neeli kameej pehni
thi. Rajan daurte hue uss laash ke paas gaya. Woh Gopi ki laash thi. Laash dhekhte hi
Rajan cheekh pada “ kaha tha tujhe Gopi, bambai mat jaa, tune meri nahi maani..” Tabhi
Cinefair ki editor Chitrangada ne Rajan ke khandhe par haath rakha. “ Kaun tha yeh

aapka?” Rajan sar upar karke dhekhta hai. Suraj ki tez roshni ne usske aankhon ko aise
chaundhyai ki woh Chitrangada ki shakal dhekh hi nahi paya. Woh uth kada hua “Madam
ji yeh mera dost tha Bambai jaa raha tha ….” “Isse milne ke liye?” Chitrangada ne Raghu
ki tasweer dhikhayi. Rajan phir se rone laga “Sab iss haramzyaade ki galti hai… aaj bhi
maaf nahi karunga isse” Chitrangada phir Gopi ke baaki samaan bhi Rajan ko dhikhane
lagi jo usse laash ke paas se mili thi. Rajan ne woh samaan dhekha aur kaha “kya aap
mujhe Sayan dabolkar ke paas le chalengi?” “ Par kyun” Chitrangada ne poocha “ Aap le
chaliye thodi der mein sab pata chal jayega” Rajan ne apne aasoon pochte hue kaha.

SAYAN DABOLKAR KE GHAR

Rajan aur Chitrangada Sayan ke ghar mein sofe mein bhaithe hue the aur saamne
deewaar par bade se ek tasweer ko dhekh rahe the jiske charo taraf ek mota sa kaala
border tha. Rajan ne apne haath mein tasweer ko dhekha aur phir us deewar par
tasweer ko. Dono hubabu ek jaise lag rahein the, tabhi Sayan Dabolkar haath jodte hue
Chitrangada se maafi mangte hue aya “ I am really sorry…… actually us time main thoda
busy tha isliye aapse thik se baat nahi kar paya. My apologies for that. Aapka jab aaj
subah phone aaya toh maine socha isse acha mauka nahi milega maafi mangne ka. I am
really sorry…” Tabhi do cup chai aur ek glass Pepsi mangwaya gaya. Sayan Chitrangada
ki taraf muskurake bole “ you see endorsement and all…. karna padta hai. Main chai nahi
peeta sirf Pepsi……..haan toh aap kuch keh rahi thi?” “ Ab main nahi yeh bhaisahaab aap
se kuch kahenge.” Rajan ne Sayan ki taraf dhekha aur phir Gopi ki chothe se jhole mein
se wajan wale ticktein, ghadi aur khilone wala camera saamne kaanch ke table par rakh
diya. Sayan ne khilone wale camere ki tarf dhekha aur phir apne SLR Camera ki taraf jo
paas mein padi hui thi, ab Rajan ne bolana shuru kiya

“ Mera ek dost tha Gopi jo kal ke train durghatna mein mara gaya. Usse aapse milne
ki badi khwaish thi. Woh aapse milne ke liye hi Murshidabad se Bambai aa raha tha.”
Yeh kehte hue Rajan ne Raghu ki tasweer Sayan ko dee. Sayan ne uss tasweer ko haath
mein lee aur dhekhne laga “ yeh toh……ekdum meri tarah hai par….” “par yeh aap nahi
hain. Mujhe pata hai, yahan tak toh Gopi ko bhi pata tha, darsal yeh Gopi ka beta Raghu
hai jo bahaut saal pehle Bambai mein aaya tha filmi line mein kuch banne. Par kaam
kuch khaas mila nahi toh light man ban gaya, filmon ke shootingon mein abhineta aur
abhinetriyon par light daalta tha. Achanak ek haadse mein uski maut ho gayi. Jab yeh
baat Gopi ko pata chali uski toh puri duniya hi loot gayi. Haala ki Raghu ladai karke ghar
se bhaag kar Bambai aaya tha. Khair……itne saalo baad jab aapke film ka poster Gopi
ne dhekha toh usse apne bete ki yaad aa gayi. Usne yeh socha ki woh aapse milega, aapse
do chaar baatein karega aur phir wapas laut jayega. Usne aap mein apne mare hue bete
ko dhekha. Woh yeh cheeze bhi le aaya tha taki aapko dhikhaa sake, par dhekhiye kya
ho gaya. Bambai aane se pehle keh raha tha ki aap se milega…..” Sayan ne saamne padi
Pepsi pee aur kaha “Aap kahe toh main yeh cheezein apne paas rakh hun?” “Tum sach
kehte ho beta rakhloge yeh sab par ek shart hai, inn cheezon se judi kahaniyan tumhe
sunni padegi jisse tumhe inn cheezon ka mol pata chalega?” Sayan ne haan bhari aur
Rajan ne Ghadi, wajan wale ticketein aur camera ki kahani batani shuru kee…”bus aur
kuch nahi chahiye ab main chalta hun” Yeh kehkar Rajan wahan se jaane ke liye utha
par Chitrangada se keh kar gaya “ Maine socha tha Bambai mein sirf paisa hi hai. Log

kiro makore ki tarah sirf bhagte rehte hain par main galat tha. Yahan par kuch log shayad
kabhi kabhar rukna bhi pasand karte hain”.

HORIPODO BABU

“Tak bak tak bak tak bak tak bak aaj main talwar se maar doonga…..tak bak tak bak…..
ha ha ha ha….. kahan bhaag ke jayega badmassh kahinka…..?” “Ruku idhar aao beta
pitaaji dilli jaa rahein hain” Ruku apni maa ki awaaz paate hi khilona chodkar apne
pitaaji ke godh mein jaa bhaithta hai. Horipodo babu apne kaam ke silsile se chaar din
ke liye Dilli jaa rahein the, “Beta kya chahiye tumhe Dilli se?” “ Pitaaji mere liye ek
talwaar le aanaa, mere sipahiyon ke paas talwaarein kam hai” Horipodo babu muskuraake
Ruku ke gaalon ko puchkarte hue bolein “Thik hain main Lal Quille mein Shah Jahan
se do teen talwaarein maang ke le aaunga”. “Sach pitaaji?.....Yeh Shah Jahan kaun
hai?....” “Arre!!! Suno tum kya isske baton mein pad rahe ho. Chalo tumhe station bhi toh
jana hai, jaldi niklo nahi toh raaste mein jaam ke wajah se tumahari train chhuth jayegi”
Horipodo ki patni ne kaha. Horipodo ne apne bete ko godh se utara aur apni attaychi
lekar nikal gaye.

Horipodo babu raaste mein jaam ke wajah se local train mein safar karna hi thik samjhe
taki Dum Dum station local train se pahaunch jayenge aur phir waha se dusri train lekar
dilli chale jayenge.

LOCAL TRAIN…..

Horipodo babu local train mein aankhein band kiye bhaithe hue the. Poschim Bongo
mein local train-o mein safar karne ka alag hi maza hai. Aap kabhi boriyaat mahsoos
nahi karenge, khuch na khuch dilchasp cheeze ghathti rehti hai. Aapko lagega ki aapne
train ka ticket nahi kisi rangmanch ka ticket kaata hai. Kabhi logon ke adbhut batein
sunne ko milengi, toh kabhi pheriwaalo ko anokhe andaazo mein alag alag cheeze bechte
hue paaye jayenge…… “ AE SUUUUAR KA BACCHA, GADDHE KA BACCHA,
BANDAR KA BACHCHA..” tabhi Horipodo babu ke paas bhaithe hue yaatri ne cheekhe
pheriwaale se bola “ Saale!! gaali kisko deta hai? Tabhi pheriwale ne ek dabba apne jholi
se nikal ke bola “AAGAR AAPKO KAATE, TOH YEH TAMBAKTU OINTMENT
LAGAAYIYE”. Apne Horipodo babu ke liye yeh sab aam baat thi. Kuch hi der baad
achanak Horipodo ke sar ke theek upar train ke deewar se takrakar ek cheez Horipodo
babu ke godh mein aakar girti hai. Horipodo babu kuch sambhal paate ki ek pheriwala
aake bolta hai “Kyun babu, dariye mat, yeh chaaku nahi…kalam hai dhekhiye deewar
se takrane ke baad bhi toota nahi aaur kaisa mast likh raha hai”. Horipodo babu thoda
muskurake bole “Shukriya, par mere paas meri apni kalam hai” kehkar woh apni
kammeez ke bayein jeb mein haath rakhte hain magar… “Meri…..meri kalam kahan
hai…..?” Horipodo babu apne seat se uth khadhe hue aur jhuk kar seat ke neeche
dhekhne lage. Issi beech Dum Dum station aa jata hai aur weh utar jaate hain.Unki Dilli
wali train dusri platform mein khadhi thi. Horipodo babu pareshan se ho gaye the, unka
kalam sirf unka kalam nahi tha ek sahayogi bhi tha. Woh kisi tarah train mein chadke
apne samaan ko seat ke neeche rakh ke bhaith jaate hain. Train chal padti hai. “Sahaab
yeh humari seat hai” Horipodo babu apne soch mein itni gaharai mein doobei hue the ki
unhone kuch suna hi nahin. Train ke ek dusre yatri ne unhe phir se bulaya “Mahashaye,
aap shayad galat seat pe bhaithe hain. Aapki ticket dhek sakta hun?” Tabhi Horipodo ne
unke taraf dhekha aur jeb se ticket nikalke unko diya aur phir se muh latkake dusri aur
dhekhne lage. “Mahashaye, yeh coach number S4 hai apki seat toh S6 mein hai.”

Horipodo Babu agli station mein utar ke coach badal lete hain aur S6 ke seat mein bhaith
jaate hai. Ek hatasha unke chehre par chhaayi hui thi…woh chalti hui train ke khidki ke bahar dusri
rail patri ki taraf dhekh rahe the.  thi…woh chalti hui train ke kidkhi ke bahar
pas dusri rail patri ki taraf dhekh rahe the…..issi beech unke saamne woh manzar ubhar ke aaya jab unko yeh kalam mili thi……..

Garmiyon ka mausam tha Horipodo babu ki nayi nayi shaadi hui thi, woh pehli baar
apni patni ko ghumane kalkatte ke bahar le jaa rahein the. Ek din daftar jaane se pehle
railway station ticket arakshan karne gaye. Unhone railway counter ke bahar railway
arakshan ka parcha liya aur ek kone mein khadhe ho gaye apna naaam aur train ka naam
likhne. “Ufff!!!! Main kalam to laya hi nahi. Arre!! oh moshayi zara suniye aap mujhe
apni kalam de sakte hain woh main apni”. Tabhi dusre aadmi ne unhe apni kalam dete
hue kaha “lagta hai aap bahaut jaldi mein ghar se nikal ke aa rahein hain?” Horipodo
babu ne zara muskurake apne chashmein ko naak ke upar rakhke kaha “Aapko kaise pata
chala?” Dusre vyakti ne kaha “Aap ghar se nikalne se pehle apne kameez mein sindoor
ka daag mithana bhul gayein hain, dhekhiye.” Dusre vyakti ne aankhon se ishaara karte
hue kaha. Horipodo ka chehra sharam ke mare laal ho gaya tha aur weh kalam lekar
sar jhukaa kar arakshan parche mein likhne lage. Tabhi station ke bahaar ek dhamaka
hua, sab log station ke bahar bhaag rahe the, Horipodo babu bhi station ke bahar aakar
bhaagne lage. Log cheek cheek kar keh rahein the aatangwaadi hamla hua hai. Horipodo
babu ke haath mein arakshan ka parcha aur us vyakti ki dee hui kalam thi. Woh sochne
lage ki woh kalam us vyakti ko wapas karni chahiye ki nahi ki tabhi unhone dhekha
woh vyakti unke saamne tez rafter se chal jaa rahein hain “Arre!!! Bhaisahaab aap ka
kalam!....Suniye yeh to lete jayiye!’ Horipodo ne yeh kaha hi tha… ki ek aur dhamakha
hua aur Horipodo babu ek taraf chitak ke ghir pade.

Jab hosh aaya toh apne muthi mein woh kalam dhekha, weh uth khade hue aur bhaagte
bhaagte uss aadmi ki talash karne lage jisne unhe yeh kalam dee thi. Unhe baar baar woh
muskurata hua chehra yaad aa raha tha. Raaste mein logo ke shav khoon se latpat pare
hue the, unhi ke beech Horipodo babu ne iss vyakti ko dhund nikala, woh aadmi mar
chukka tha…Horipodo babu ne socha kya yeh kalam iske shav ke paas rakh dun? Kya
mare hue aadmi ki koi cheez apne paas rakhni chahiye. Yeh sochte sochte weh kalam
us vyakti ki jeb mein rakhne lage ki tabhi unhe khyaal aaya ki kya pata yeh kalam unke
liye bhagyashaali ho isilye shayad woh bach gaye jabki woh iss vyakti ke khuchi faasle
par the jab dusra dhamakha hua. Yeh sochkar unhone woh kalam apne paas rakh liya.
Jab woh uthkar jaane lage toh unko ek khyaal aaya ki is vyakti ke parijano ko ittala
karni chahiye. Woh us shav ke paas baith gaye aur patloon ki jeb se us vyakti ka batua
nikala aur use kholte hi unhe usmein se us vyakti ke office ka pehchaan patra milaa,
usmein ghar ka pata likha hua tha. Woh ek rikshe mein us shav ko lekar us vyakti ke ghar
pahaunchte hain. Unke khud ki kameez is vyakti ke khoon se latpat ho gayi thi . Hala ki
choth inko bhi lagi thi par in sab ghatanao ke beech, woh apna dard bhool gaye the. Kuch
der baad woh shav lekar is vyakti ke ghar pahunchkar darwaaza khathkhatate hain, jab
darwaaza khulta hai to tabhi Horipodo babu bol padte hain “Tum?”………

“ sir chai peeyenge adrak waali chaaye” ek chaye wala train mein musaafiron se pooch
raha tha, Horipoda babu ne uski taraf dhekh kar haan bhari, garam garam chaye peene
ke baad unka man thoda shaant hua, thodi der mein ticket checker aakar ticket mangne
laga. Horipodo babu ne ticket diya aur ticket checker ke kalam ko dekhkar unko phir se
apni kalam ki yaad aa gayi, unhone apne jeb ko phir se dhekha aur lambi saans lekar phir
se muh latkake bhaith gaye…… baaki din train mein sadharan tarike se guzra, raat ko
kareeb nau baje unhone phir bhojan kiya aur phir bakse se apne daftar ke khuch kagzaat
nikale aur unko gaur se padne lage. Padte padte……….

“Horipodo babu o Horipodo babu mera kalam aapke paas hai Horipodo babu?” jis
vyakti ne unko us din kalam likhne ke liye diya tha woh Horipodo babu se apna kalam
mang rahe the, khoon se latpat kapde phathe hue Horipodo babau ke taraf chale aa rahe
the…Horipodo babu ek kalam ko pakade hue the jo ki 6 feet lamba aur 2 feet chaura
tha… “ nahi yeh kalam main nahi de sakta yeh bahaut bagyhashaali kalam hai mere
liye main nahi de sakta “ Horipodo babu us 6 feet ke kalam ko apne haatho aur shareer
se jakde hue the ki achanak us mare hue vyaikti ne Horipodo babu ko dhakkha diya.
Horipodo babu kalam sahit zameen mein gir gaye aur woh kalam tooth gaya, kalam tuth
te hi sihai ki jaga laal khoon bahane laga. Horipodo ki kameez khoon se latpat ho gayi
thi. Us mare hue vyakti ne Horipodo babu ko bola “Meri kalam wapas…..”

“Sahaab Dilli aa gaya hai ab uthiye ?” Train ke ticket cheker ne aakar kaha.

DILLI

Dilli pahaunchkar weh ek hotel mein chale gaye jahan pehle se unke naam se ek kamra
book tha. Unhone apna samaan rakha, haath muh dhoye aur turant hotel se nikal gaye ek
stationery ki dukan ki khoj mein. “Bhaisahab, aapke paas kaali syahi wali Chelpark ka
kalam hoga?” Dukaandaar ne unhe Chelpark ke paanch-che kalam dikhaye aur Horipodo
babu ko ek kagaaz thamathe hue kaha “Yeh lijiye, likhke dhekh lije.” Tabhi Horipodo
babu ne muskurake unmein se ek kalam uthaya aur likhne ke bajaye use apne kameez
ki jeb mein rakha aur aankh bandh karke kalam par apna hath pherene lage, phir dukaan
mein idhar udhar chalne lage. Dukaandar yeh saab dhekh raha tha. “Achaa bhaisahab
isse thoda bhaari wajan ka kalam milega?” Dukandaar thoda chakit hoke bole “Matlab?”
Horipodo babu ne apne chashme ko naak ke upar karte hue kaha “Matlab thoda aur
wajandar”. Dukaandar ne thodi apni kameez ke kolar ko theek karte hue aur muskuraate
hue bola “Sir kalam ka wajan toh likhne wale pe nirbhar karta hai. Woh kaise usse upyog
mein laata hain.........kyun sir....... thik nahi kaha maine?” Horipodo babu muskurayein aur kalam
ka daam chuka kar kalam lekar hotel mein aa gaye.

Hotel ke bageeche mein Horipodo babu ek pyaali chai lekar bhaithe hue the, unke haath
mein kalam tha jisko woh ulat palat ke dhekh rahe the. Tabhi woh uth khade hue aur paas
pada ek chotha sa pathar apne haath mein utha liya aur apne hotel ke kamrein mein chale
gaye. Unhone apna baksa khola,kapde seene ke dhaage ka ek roll nikala. Horipodo babu ne woh chotha
sa pathar kalam par dhaage se bandh diya aur apne jeb mein rakh ke, kamrein mein
chalne lage aur jeb par hath rakhte hue bole “Ab thik hai?”

Agle din unke daftar ka conference tha jiske liye woh Dilli aaye the. Dilli ke Indian
Habitat Centre mein jab woh pahunche toh unhe bataya gaya ki kissi kaaran varsh,
conference agle din hoga. Horipodo babu ne socha issi beech Dilli ghooma jaye. Unhone
taye kiya pehle hotel jayenge phir kapde badal kar Dilli ghoomne nikalenge. Hotel
pahaunchte hi pata chala ki hotel mein ayakar wibhag (income tax) ki raid padi hai aur
kyunki woh bhi us hotel mein thehre hain, unko bhi wahin rukna padega jab tak ayakar
wibhag ke afsaron ki poochtach khatham na ho jaaye. Horipodo babu hatasha bharein
nazar se hotel ke sofe par bhaith gaye. Unhone jeb se apni nayi kalam nikaali aur usse
dhekhte rahe. Unhe laga unke paas unki woh poorani kalam nahi hai issiliye yeh sab ho
raha hai. Pehle toh conference ek din der se ho gaya aur ab hotel mein raid. Horipodo
babu ne kalam mein jo chotha pathar bhandha tha usko kalam se alag karke bahar phekh
diya par gadbad yeh ho gayi woh pathar bahar na jaake ek deewar par tangi tasweer
ke sheeshe se jaa takrayi aur woh tuth gayi. Horipodo babu khuch keh pate ki hotel ke
manager Horipodo babu ke saamne akar khade ho gaye. Horipodo babu unko dhekhke
bole “Woh darsal mere kalam mein ………aap….aap bill mein jod lijiyega …”

Agle din conference ke khatham hote hi unhone socha aaj mauka hai….Dilli ghuma jaye.

Dhopahar ko kareeb chaar baje Qutub Minar, chiriyaghar dhekhkar Lal Quille
pahaunche. Unhone abhi tak yeh sab kitaabo mein tasveer ke roop mein hi dhekhi
thi. Lal Quille mein ghuste hi unhe Meena Bazaar dhikh jaata hai, Horipodo babu ne
apni patni ke liye wahan se khuch jhumke, duppatte aur bete ke liye ek chhota sa putla
khareeda jisne ek talwar pakdi hui thi aur phir wahan se aage chal diye, Lal Quille ke
ek deewar par ek board tanga hua tha jismein shaam ko rangarang karyakram ‘LIGHT
AND SOUND’ ke barein mein likha hua tha. Unhone Quille ke andar ek bhojanalaye
mein khana khaya aur Light and Sound dhekhne ke liye ticket ki khidhki ki aur chale
gaye. “Light and Sound kitne baje shuru hoga?” “Sham ke chhe baje andhera hone ke
baad”.

LIGHT AND SOUND ek aisa dilchasp karyakram hai jismein apko Lal Quille ke andar
sthapith alag alag chhoti chhoti mehlon par roshni daalkar aur sangeet aur tarah tarah
ke awaazon ke madhyam se Dilli ke ithihas ke baarein mein bataya jata hai. Keh sakte
hain aapke saamne purane dilli ko pesh karna hi mul aakarshan hai. Yeh kahani Mughal
samraat ke dinno se lekar san 1947 ke beech ke waqt ko darshaata hai. LIGHT AND
SOUND karyakaarm hindi filmon aur rangmanch ke naami abhinetao ko lekar banaya
gaya hai. Iss karyakram mein aap inke sirf awaazon ko sun payenge alag alag dialogue
ke roop mein. Koi Shahjahan ki awaaz hai toh koi Aurangzeb ki. Isske nirdaishak hain
Chetan Anand.

Horipodo babu ticket khareed kar Lal Quille ke andar sthapith chhote chhothe mahalon
ko dhekh rahe the, garmi hone ke karan woh ek mahal ke andar thak ke bhaith gaye.
Dophar ka bhojan karne ke karan neend aana aniwarya tha.

UNHONE APNI AANKHON SE MAUT KE PHARISHTEH KO SHAHI
MEHAL MEIN MANDRAATE DHEKHA HAI. SHAH JAHAN KE BETON NE
YEH AFWAHEIN SUNI AUR HAR KOI HINDUSTAN KA BADSHAH BAN
BHAITHA, BHAI NE BHAI KA KHOON BAHAYA. BIMAAR BAADSHAAH
BEBASI SE YEH SAB KHOONI TAMASHA DEKHTA RAHA. AKHIRKAR
SHAH JAHAN KE TEESRE BETE SHEHAZADE MOHIRUDDIN MOHAMMED
NE SAB BHAIYON PE FATEH HASIL KI AUR SAN SOLAH SOH UNSATH
MEIN AURANGZEB AZAMGIR KE NAAM SE SHEHNSHAH KA ELAN KAR
DIYE GAYE. Issi beech Horipodo babu jag gaye, unke aas paas yeh sab awaazein
gunj rahi thi, kabhi lal toh kabhi peelein rang ki roshni unke chehre par pad rahi thi
unhe yaad ayaa ki Light and Sound ka karyakram shuru ho gaya hai par ab woh jaayein
kahan…… bahar toh andhera hai aur mehal ke andar roshni ke wajah se unke aankhein
bhi chondhiyaan jaa rahi thi, mehalon ke andar speakeron se paani ki kal kal awaazoin
se unka gaala aur bhi sookh raha tha, thodi der mein unhe durr se ghoddon ke pairon ki
awaazein sunayi dene lagi , kuch der baad woh ghodon ke awaazein unke kaano ke bilkul
paas se guzarne lagi. NAADIR SHAH GHODE PE SAWAAR HOKAR QUILLE KE
BAHAR NIKAL SADAK PAR APNE SIPAHION KE LAASHEIN DHEKHKAR
USKE AANKHON MEIN KHOON UTAR AAYA. “ JABTAK MERI TALWAAR
MYAN SE BAHAR HAI TAB TAK IS MUKKABAL SHEHAR MEIN KISIKO NA
CHORA JAYEGA….BHUDHE… BACHCHE….. MARD….. AURAT….. SABKE
SAB UTAR DO, JO SAAMNE AAYE KHATHAM KAR DO”. Horipodo babu ke
passeene chuth gaye the. Unhone jab apne haathon se apne mathe ka paseena pochha to
unke haathon mein unke bete ke liye khareeda hua putla roshni mein Nadir Shah jaisa
lagne laga tha unhone turant usse zameen par phek diya. Horipodo babu itne darein hue
the ki unke kapde passene se bheeg gaye the. Horipodo babu chup chupake khade hue aur
wahan se bhaag gaye.

Agle din Horipodo babu dophar ko kalkatte ke liye nai Dilli railway station pahunch
gaye. Kuch hi der mein train chal padti hai. Horipodo babu ab aur bhi dukhi the. Ek toh
unke paas kalam nahi thi aur dusri woh bete ke liya hua khilona Lal Quille mein chhor
aaye the. Kuch hi der mein railway karmachaari unko khaanna paros gaye, weh khana
khakar apne seat par let gaye, let tehi unke saamne upar lagi ceiling pankhe nazar aane
lage weh usko dhekhne lage aur sochne lage. Unke saamne phir se wahi kalam waali baat
wapas ubhar ke aane lagi....... Kuch der baad woh shav lekar is vyakti ke ghar pahaunchkar
darwaaza khathkhatate hain, jab darwaaza khulta hai to tabhi Horipodo babu bol padte
hain “tum”.

Horipodo babu ki patni khadi hui thi. Unki patni ke peeche us marein hue vyakti ki biwi
bhi akar khadhi hui. Jab usne apne pati ke shav ko dhekha toh cheekh padi, Horipodo
ki patni bhi saham si gayi thi. Weh Horipodo ke taraf dhekhke rone lagi, aas paas se aur
bhi log aa gaye unhone shav ko Horipodo babu ke paas se lekar ghar ke andar le gaye.
Horipodo babu ne apni patni ko sambhalte hue poocha “Tum… tum yahan kya kar rahi
ho?....” Horipodo Babu ki patni ne kaha “Kanakmala meri bachpan ki saheli hai, aur
jiska shav tum laye ho woh iska pati, subhah tumhare ghar se nikalne ke baad yeh dono
hamare ghar ka pata pooch kar hum dono se milne aaye the. Baaton baton mein jab unhe
maine bataya ki hum ghumne jaa rahein hai toh unhone bhi jaane ki iccha zahir ki….uske
baad Kanakmala ke pati ne kaha ki woh abhi railway station jayenge arakshan karne ke
liye, unhone kaha ki kanakmala khud wapas ghar chali jayegi,
Par tumnhe yeh kahan mil gaye railway station par?” “ Aare!! Main apni kalam bhool

gaya tha toh inse yeh kalam liya tha likhne ke liye ki tabhi railway sation ke bahar
dhamakha hua….” Tabhi Horipodo ki patni bol padi “Arre!! Yeh kalam toh maine hi
inko diya tha…inke paas kalam nahi thi….” Horipodo babu yeh sun kar wahin raste mein
bhaith gaye. Unko aur bhi vishwaas hogaya ki yeh kalam ke wajah se hi woh zinda the.
Tab ka din tha aur aaj ka din hai, matlab char din pehale tak unhone kabhi bhi woh kalam
apne se alag nahi hone diya. Jab unki neendh khuli toh woh station pahaunch
gaye the. Horipodo babu ne phir se local train pakdi aur apne ghar pahaunch gaye.

Darwaaza kholte hi Horipodo Babu ki patni ne dhekha ki inka muh latka pada hua hai.
Horipodo babu ne saari ghathna bataayi, Horipodo babu ki p kalkatta atni ne kaha “Koi baat nahi
shayaad yahi tak us kalam ka tumhare saath tha. Horipodo babu ek taraf apni aataychi
rakhte hain aur sofe par bhaithte hain ki tabhi unka beta unki godh mein aa bhaith ta
hai. “Beta Ruku iss baar tumhare liye talwaar nahi laa paya. Hua yun ki main…..” “ Koi
baat nahi pitaaji tab tak main is kalam se kaam chalaa lunga…” Horipodo ki aankhein
kalam ko dhekte hi phathi ki phathi rah jaati hai “ KYA?..... yeh kalam kahan se mila
tujhe ….?” “ Pitaaji aap jab dilli jaa rahein the aur main aapke god mein tha to tabhi
maine yeh kalam apke jeb se nikaal liya tha, ab yehi mere siphahi ki talwaar hai, chal
mere ghode tak bak tak bak kehte hue Ruku Horipodo ke god se utarkar bhag gaya.


P.S: light and sound dialogues taken from Youtube.

MATINEE

Interval mein, Basant Chakraborty cinema hall se cigarette jalate hue apne manager ke saath bahar aate hain “sir paaablic toh khaache, cinema toh hit…..” “Hmmmm. Chalo, driver ko bolo Coffee Home chalne ke liye” Basant Chakraborty Kalkatte ke naami nirdaishakon mein se ek hain. Way apni ha rek picture apne darshakon ke saath bhaith ke dhekhte hain. Agar unko lagta hai ki darshakon ko unki picture pasand aa rahi hai toh woh apne manager ke saath bhaith ke Coffee Home mein chaar chicken sandwich aur ek cup coffee lena pasand karte hain. Aur agar picture flop hui toh ghar wapas jakar khichdi. Sirf ek baar chhodkar unko kabhi kichdi khane ki naubat nahi aayi. Way bhi jab ek baar Jatin Dey namak, Bambai ke ek naami nirdhaishak ki picture uss saal release hui thi…. uske chalte Basant Chakraborty ki picture ko achhi shuruaat nahi mili aur baad mein picture pith gayi.

“ Sir, CINEFAIR magazine ki chief editor Miss Chitrangada Sen ne aapke liye ek phoolon ka guldasta bhejha hai” Coffee Home ke manager ne aakar kaha. Basant ke manager Shoumitro thoda muskurakar Basant ke taraf dhekhte hue bole. “ Chitrangada madam without fail aapke har picture ke hit hone par Coffee Home mein guldasta bhejti aayin hain…..” Basant thoda muskuraye aur bole “Chitra aur main kal thode dost bane hain, we go back to those advertising days, you see.” “Toh baat khuch aage badi ya guldaste pe guldasta hi chal raha hai?” Tabhi ek mahashaye in dono ki taraf haath jode hue aate hain “ mere toh bhagya hi khul gaye, aapke is tarah darshan ho jayenge, yeh toh maine apne sapne mein bhi nahi socha tha …………Sir, main aapka bahaut bada fan hun… Aapki har ek picture maine first day first show dhekhi hai, Madhaystith, Aakrosh, Kush-ma-kash, Baadshaa hi Heera aur aaj jo release hui hai Murtighor….”

“Aapki tareef?” Shoumitro ne poocha “ Oh sorry sorry! Mera naam Haradhan Chatterjee hai, main ek kapdo ka vyapari hun….aap agar…” “ laiye kahan autograph dena hai?” Basant ne kaha “ nahi autograph nahi chahiye……nahi matlab chahiye autograph…. uske pehle ek baar….. aap mere bhatiji se miliye, woh bhi aapki bahaut badi fan hai….ae Nondini edike aaye tarataari” Basant Nandini ko sar se pao tak dhekhte hain “ Toh kya karti hain aap?” “ Basant da, main filmon mein kaam karna chahati hun, mujhe apne aap ko bade parde par dhekhne ka bahaut shauk hai” Basant ek cigarette jalate hue kehte hain… “ Why don’t you take a seat?” Aur woh Nandini ke chacha ke taraf ishaara karte hain ki woh kuch samay Nandini ke saath bitana chahate hain, yeh samajkar Mr. Haradhan Chatterjee wahan se chale jaate hain. Basant Nandini ko cigarette pesh karte hain par Nandini mana kar deti hai “ Yeh kya. Aap cigarette nahi piti? Agar main ek nirdaishak ke taur par kahun ki picture mein cigarette peena zaroori hai tab bhi aap nahi peeyengi?” “ Nahi woh baat nahi hai, agar picture mein peena zaroori ho toh zaroor peeyungi, anything for cinema”. “ Shoumitro bill ka payment karde, Nandini humaare saath gaadi mein jaayengi .”

Basant Nadini ko apne saath gaadi mein bhithate hain, thodi der mein Shoumitro aakar driver ke paas jakar bhaith jata hai aur gaari chal padti hai…… Gaadi ek traffic signal pe rukti hai. “ Main soch raha hun meri agli picture mein tumko nayika ke taur par loon”. “Aap kahin mazaak toh nahi kar rahein hain?”. “Mera sense of humour itna sasta nahi hai ki har baaat par use prayog karoon …you see. Ek kaam kariye…… woh footpath par nange badan mein bachcha dhek rahin hai aap?” Nandini sar hilathi hai “toh agar main aapko kahoon ki abhi aap gaadi se utrein aur us footpath par bhaithe bachche ke behti naak ko apne haathon se saaf karein aur usko galein se lagayen, toh kya aap karengi?….Samjh lijiye yeh aapka screen test hai”

Nandini ekdum se tham jati hai….. “ Kyun Miss Nandini…… aap utrengi?” Nandini gaadi se utarti hai, phir paas ke footpath mein bhaithe us nange badan wale bachche ko dhekhti hai, bachcha bhi uski taraf muh uthake dhekhta hai, uske bahti naak ke aas paas makhiyaan bhin bhina rahi thi. Nandini gaadi mein bhaite Basant ko dhekhti hai, aur phir bachche ko, phir footpath par bhaith ti hai aur paas pade ek gande kapde ke tukre se bachche ki bahti hui naak saaf karti hai…aur Basant ke taraf dhekhti hai “ Driver chalo signal green ho gaya hai…” “ Agar us ladki ko mana hi karna tha toh aise hi kar dete…… yeh sab karne ki kya zaroorat thi?” Shoumitro ne poocha “ Shoumitro isilye tu gaadi ke aage waali seat par bhaitha hai aur main pichle waale par…….”

DO HAFTE BAAD…..KOLKATTA FILM STUDIO……

“Aare Mridul! Kamra number saath mein kaun kiski naukri kar raha hai re? “ Sir Jatin Dey ki nayi picture ki shooting chal rahi hai.?” “ Kyun? Bambai se nikaal diya usse.?”. “Nahi sir, picture kalkatte par hai toh isiliye…..” “ Kalkatte par, hindi picture….. phir toh…..…….” Kehte hue Basant uss kamrein ki taraf chale jaate hain…. “Aaiye aaiye Basanta da, andar aaiye” Picture ke sahayogi nirdaishak unhe andar le jaate hain. Tabhi scene shoot hona khatham hota hai aur Jatin Dey CUT bolte hain…… Basant Jatin ke saamne dono hath apne peeche karke kadhe hokar kehte hain “ Sir nomoshkaar” “Arre! Basant………………… kaisa hai, arsa ho gaya humein mile, aur bata ?” “Surviving……tu?”. “Aare bus chal raha hai, kabhi Switzerland, kabhi England toh kabhi yahan shooting ke silsile mein aana padta hai. Cigarette peeyega… Teri picturein toh kaafi achi chalti hai, saari picturein dhekhi hai maine…. kaafi umda hai” Jatin muskurakar bole

“ Arre kahan yaar, picturein toh tum log Bambai mein banate ho, chataake daar logon ke saath, chamkile lighton mein. Tum logon ke pictureon ke saamne humari picturein toh documentary lagti hain. Achha, chalta hun, by the way kitne din hai yahan?”. “ yahi koi teen din, phir wapas Canada mein shoot hai”. “ Toh aaj shaam ko aa mere ghar, Raat ka khana ek saath khayenge, pata nahi Bambai mein kya khaane ko milta hai tujhe, par aaj ka khana mere saath khayega toh specially tere liye Rui Kaaliya, Bhaapa Ilish, Kosha Manghso ghar pe banane ko kahunga…bol aayega?’ Jatin apne DUNHILL ke packet ka akhri cigarette jalate hue kehte hai “ Zaroor aaunga yaar, bahaut din hue, bahut baatein karni hai. Shaam ko saath baje aata hun, thik hai?” “Toh phir saath baje mere ….” “Arre Basant, sorry yaar, next shot lena hai shaam ko baat karte hain”

Basant ghar aate hi aapne Study room mein jakar agli script ke liye apni purani kitaab daraaj se nikalte hain, ki tabhi ghar ka bawarchi aata hai aur raat ko khaane mein kya banega poochta hai. Paas khada Shoumitro bolta hai “ Haan, bazaar se taazi machchli le aa, Rui Kaali…..” Basant Shoumitro ki taraf haath dhikhake boltein hain “ sirf Mussor ki daal, chawal aur Begoon Bhajha aur kuch nahi, thoda zyada karke banana apna Shoumitro bhi yahin khayega” “ Par dada woh Jatin…”. “ Mujhe lagta hai woh nahi aayega”, kehte hue woh apni peeli wali script ki kitaab lekar baraande mein chale jaate hain. Raat ko kareeb saath baje darwaaze pe ghanti bajti hai. Shoumitro jaake darwaaza kholta hai “ Arre! Aap, aaiye aaiye. Dada ka mizaz thoda kharab hai……..barande mein apni peeli kitabh lekar bhaithe hain”. Shoumitro barande ki taraf ishara karte hue bolta hai “ Kyun? Guldasta jo bheja tha woh pasand nahi aaya?”. “Arre! Chitra, aa bhaith, haan actually quite predictable, you see, har ek picture ke hit hone ke baad tu ek guldasta bhej deti hai, kabhi khud bhi aa jaya kar. Acha woh sab chhor, kaise aana hua?”

“Kuch nahi, bahaut din se mili nahi thi isilye chali aayi”. Chitrangada barande se bawarchi ko pukaarti hai. “Polu da, teen piece Begoon Bhajha mere liye alag se banana, aaj main khana yahin khaungi”. Basant ek cigarette jalate hain aur phir Chitrangada se kehte hain “ Aur kaisa chal raha hai magazine, anything bad about me?” “ Kyun tujhe aisa kyun lagta hai ki hamara magazine tere baarein mein kharab likhega. Tu kabhi kabhi acha kaam bhi toh karta hai”. Chitrangada aankh marte hue kehti hai. “ Nahi, dusre magazine mein toh har samay mujhe makhkhan marne ke liye acha hi likhte hain isiliye poocha”. “Hmmmm! Agar bura hi sunna hai apne baarein mein toh shaadi kar le, abhi bhi sar ke khuch baal kaale hain.” Chitrangada Basant ke sar pe haath pherete hue kahati hai. “Aur tu kab karegi ?” “Dhekh yeh sab phaltu ke chakkar mein nahi padna ab mujhe, as if you don’t know what happend with me?” Chitrangada bhi ek cigarette jalaate hue kehti hai “toh kya hua shaadi toh nahi hui thi naa toh phir……..”

Tabhi Polu da teeno ko khane ke liye bulata hai “ aapko pata hai Jatin Dey aaya hua hai film ki shooting par yahan kalkatte mein?” “ Haan pata hai uska bhi ek interview karwana hai for the Bombay edition.” Chitrangada yeh kehkar Basant Chakraborty ke taraf dhekhti hai. “ haan………..woh actu….ally…… aaj mila tha main usse uske set par, hua yun ki main gaya tha studio khuch kaam se toh….wahin………” Basant ne Chitrangada ke taraf dhekh ke kaha,. “ dada ne toh unhe khaane ke liye bhi kaha tha aur bola ki woh aayenge toh Bhapa Illish, Kosha Mangsho aur pata nahi kya kya khilayenge, par woh aaye nahi.” Chitrangada yeh sunkar ekbaar Shoumitro ki taraf dhekhti hai aur phir Basant ki taraf “Par Kosha Mangsho, bhaapa Illish bhi toh nahi bana hai?” “Dada ne ghar aake kaha ki woh shayad aayenge nahi toh mat banao yeh sab........ dada ke saath itne din rehne ke baad bhi main inhe samaj hi nahi paaya”. “ Par woh aaya bhi toh nahi yeh bhi toh dekh”, Basant ne bola. “Polu da khana acha bana hai, khas karke Kosha Mangsho” kehkar Chitrangada muskurati hai. Basant Shoumitro ki taraf gusse bhare nazron se dhekte hain, par Shoumitro ko khuch farak nahi padta hai kyunki woh aapne khaane me mushgul hai.

CHE MAHINE BAAD….

“Haan bol Chitra……….acha thik hai…..haan train se hi jaa raha hun …..ok ….parson main aur Shoumitro jaa rahein hain……. baaki unit do din baad pahaunchegi saara samaan wagera lekar…..thik hai rakhta hun” Basant phone ka receiver rakhte hain aur ek cigarette jalakar apne barande mein jakar khadhe ho jate hain……thodi der mein Shoumitro wahan aata hai “Achha sun Shoumitro, Banaras jaane ke liye do nahi teen ticket katwa, parson ki….woh Cinefair ke….” “ kaun Chitra madam?” “ Nahi koi aur chalega” “Achha uska paisa toh Cinefair baad mein bhar dega na?” Basant Chakraborty ek lambi saans bharte hue kehte hain “Ji sir, aur kuch?” “Dada woh Banaras mein sab tayyariyaan ho gayi hai, wahan ke mayor se bhi permission mil gayi hai, mayor sahab ne aapko nayi picture Murtighor ke liye abhinandan bheja hai” “ Hmmmmm, kaafi bhale manush hai Mr. Shrivastav. Murtighor ke shooting mein koi pareshani nahi hone dee thi” “ Iss baar toh aap pehli baar picture ka aakhri ansh pehle shoot kar rahein hain..koi dikkat toh nahi aayegi?” Shoumitro poochta hai “ editing mein thik ho jayega, kalkatte mein aake baaki shuru ka hissa shoot karoonga….thand ke mausam mein isse acha samay Banaras mein shoot karne ko nahi milega…..”

BANARAS…..

“ dada shot ready hai, ek baar dhekh lijiye camera angle thik hai toh hum take lete hain….” Basant camera ke saath crane mein chadte hain……pehla take hone ke baad crane niche utarta hai aur Basant crane se utarkar picture ke abhineta ek chhote bacche ke pass jaate hain. “Beta, tum jab galiyon se chalkar us khidki wale point pe aa rahe ho us point pe jake khidki ke andar us aaine mein dhekhna, aisa nahi lagna chahiye ki tumhe pehle se pata hai us kamrein mein aaina hai….thik hai?” Ladka muskurake sar hilata hai… Basant phir se crane mein baith te hain aur shooting shuru hoti hai. Bachcha galiyo se guzarta hua camere ki taraf aar raha tha aur Basant camera sahit crane ke saath dheere dheere che foot ki uchai se niche utar rahe the ki achanak unka paair fisal jata hai aur woh crane se niche gir padte hain, shooting ruk jaati hai. Shoumitro cheekhte hue Basant ke paas aata hai, Basant ke sar se khoon aur muh se safed jhaag nikal rahe the,

Shoumitro aur sahayogi nirdaishak log unhe gaadi mein lekar aaspataal pahaunchte hain. Doctor unhe operation theatre le jaate hain. “ Hell…o ..hello! Madam Chitrangada, main Avinash bol raha hun. Basant Chakraborty ka accident ho gaya hai, crane se girkar sar pe gehri chot ayi hai …..haan haan…..abhi abhi operation khatham hua hai aur unhe ICU mein rakha hai.” Chitrangada Kalkatte se agli flight lekar Banaras pahaunchti hai. Chaobis ghante beetne ke baad Doctor kehte hain ki khuch complications ke wajah se woh coma mein chale gayein hain.Yeh sunkar Chitrangada aur Shoumitro dono Basant ko Banaras se Kalkatte ke ek naami aaspatal mein bharti karte hain. Wahan pe bhi nirasha hi haath lagti hai. Tab tak saarein akhbaaron aur television mein yeh khabar har jagah fel jati hai. Jatin Dey Bambai se Kalkatte ke aspataal mein Basant ko dhekhne aate hain aur ICU ke bahar khade hote hai ki tabhi “So finally you got the time to meet him?” “Matlab” Jatin ghumkar sofe pe bhaithi Chitrangada ko dhekhke kehta hai “Nahi, kareeb saath aath mahine pehle jab aap Bambai se Kalkatte shooting ke liye aaye the toh Basant ne aapko khaane pe bulaya tha, nahi aaye the aap. Aaj mauka mil gaya, yaa aise hi aaye the dhekhne ki zinda hai ya mar gaya?” “What the fuck! You have taken leave of your senses or what? He is my friend for god sake”. “I have taken leave of my senses Mr. Jatin Dey? Yeah right …. ” “ dhekho, scene create mat karo yahan pe, sab hamare taraf dhekh rahein hai” “ achha I am creating a scene Mr. Director aur uss din…..” Tabhi aaspatal ki nurse in dono ko chup hone ko kehti hai. Jatin wahan se chale jate hain, Shoumitro ko yeh bolkar ki kuch bhi zaroorat pade toh kabhi bhi phone kar le woh aa jayega. Shoumitro ne haan bhari, usne bhi jyada kuch nahi bola in dono ki chothi si jhadap ke baad. Basant ki halat na bigaad rahi thi na sudhar rahi thi…aspataal ke doctoron ne unhe ghar le jaane ke liye kaha.

DO SAAL BAAD…

Basant kareeb do saal baad coma se bahar nikalte hain, keh sakte hain yeh ek chamatkaar hi tha…… Par doctoron ne kaha ki ab woh filmein nahi bana sakenge kyunki unke do paair aur unka bayan haath ab kaam nahi karte. Sar pe chot lagne ke kaaran, nervous system mein kaafi haani pahaunchi hai, par woh bol sakte hain.

“Shoumitro, ek baar Chitrangada ko phone lagayega kuch zaroori baat karni hai” Shoumitro apna cigarette barande mein bujhakar Chitrangada ko phone lagata hai. “Chitr….aaaaa….. kuch kaam hai gussa toh nahi hoyegi tu?” “Kyun bata?” “Mujhe Jatin Dey ka Bambai ka number chahiye, de sakti hai?.........................are sun to……kuch kaam……are sab bataunga ek baar usse baat ……haan bol 022 41376390… thank you” Basant ka phone paate hi Jatin Bambai se Kalkatte Basant ke ghar pahunchta hai. Jatin Basant ke study room mein ghusta hai, jahan Basant apne wheel chair mein bhaithkar apne peeli diary mein kuch likh rahen hai. “Nomoshkaar sir” Basant Jatin Dey ko dhekhar muskuraye aur paas aane ko kaha, Jatin ke paas jate hi Basant apne dayein haath se Jatin ke haath ko kaske pakad lete hain aur phir muh upar karke Jatin ko dhekhke muskurate hain. Jatin Basant ki aankhon ko num hote hue dhekhte hain. “Basant, bata kya baat hai? Kyun bulaya mujhe koi pareshani hai bhai?” “Kosha Mangsho, Bhaapa Illish khayega?” Jatin ghutno ke bal Basant ke wheelchair ke saamne bhaith jata hai aur haan kehta hai. “Tu meri picture direct karega, jise banate samay mera accident hua tha?” “ Main…….par main hi kyun..?” “Aur kaun…..iss picture ko mere alawa koi bana sakta hai toh woh sirf tu hai, yaad hai shuruaat ke dino mein humne ye kahani discuss ki thi, yaad hai those advertising days?” “Haan par darr lagta hai yeh kahani tere dil ke bahaut kareeb hai main iss kahani ke saath justice karpaoonga ki nahi?” “Tu kar payega Jatin, tu hi kar payega mana mat kar mere bhai”. “Par mere picturein toh tujhe chatakedaar lagti hain?” “Haan, kuch picturein lagti hain par har ek picture nahi. Mujhe pata hai tu kya hai Jatin, isiliye main chahata hun tu yeh picture banaye, yeh meri ek matra binti hai”.

Jatin khade ho jaate hain aur uski nazar paas pade table par SATYAJIT RAY ki OUR FILMS THEIR FILMS wali kitaabh par jaati hai. Woh us kitaab ka pehla panna palate hain to usmein sihahi se likhi bade bade aksharon ko padte hain. TO BASANT FROM CHITRA. “Chitrangada se baat hoti hai teri?” “Haan usi ne hi toh tera number diya mujhe” “Uske paas mera number hai abhi tak?” “Kaunsi badi baat hai, Chief Editor hai, unke paas toh sare nirdaishakon ke number hote hain”. “Hmmmm”. Tabhi khaaane ke liye Polu da bulaate hain. Khaana khathe samaye Jatin ki nazar samne deewar par jaati hai “Oh my gosh!!!! Yeh Ray aur Ghatak ka eksaath kheecha hua picture kahan mila,?!! Brilliant, I must say, kyun”. Basant bhi tasweer ke taraf dhekhte hain….dono khuch der ke liye us tasweer ki taraf dhekhte rahte hain “Toh kya socha tune? Banayega meri picture? Jatin agar tujhe lagta ha yeh picture flop karegi toh…......” “Dekh Basant, yeh picture flop kare ya hit main ye picture tere liye bana raha hun, tujhe khush dhekhna chahata hun bus. Tu mujhe script dede, main apni baaki picturon ke dates peechche kar doonga, aur yeh picture pehle banaunga” “Wah wah! tune ek mere sar se bhoj halka kar diya, ok then lets celebrate. Khane ke baad hum Ray aur Ghatak ki saari picturein dhekhenge, thik hai?” Basant ek bachche ki tarah Jatin ko poochte hain…… “Pehle Ajantrik, phir Apur Shonshaar…?” Jatin bolta hai “ Nahi, pehle Pather Panchali phir Meghe Dhaka Tara”. “Nahi Pehle Meghe Dhakaha Tara phir Shuborno Rekha phir Charulata”……………..

AATH MAHINE BAAD

Jatin Basant ki adhoori picture banate hain, special screening ke liye kalkatte mein ek cinema hall book kiya jata hai, Basant Chitrangada ko bhi amantran bhejte hain……picture shuru hoti hai, Jatin Basant ke paas bhaith ke picture dhekhte hai. Picture jab khatham hone wali hoti hai, Basant Jatin ka haath pakadke kehte hain “Tune bahaut achi picture banayi hai Jatin, itna achha toh main bhi nahi bana pata” Cinema hall mein andhera hone ke bawajood screen ki roshni mein Jatin ne Basant ki aankhon mein aason dekhe, unka chehra aasooan se bheegh gaya tha. Picture thodi der mein khatham hoti hai, hall mein lightein jal jaati hai aur Chitrangada Basant ke paarthiv shareer ko dhekhke cheekh padti hai. Paas mein bhaithe Jatin Basant ke shareer ko dhekhe apne haathon se usse do teen baar hilaate hain, uske khud ke haath paair thande ho jgaye the. Shoumitro apne seat se uthkar basant ke shareer ko dhekhe cheekne lagta hai.......thodi der mein Jatin apne aap ko sambhalte hain aur Basant ke aankhon ke khule hue palkon ko apne haathon se band karte hain joki kaale screen ki taraf dhekh rahi thi..........

Tehra din baad Basant Chakraborty ke ghar se Jatin Dey Bambai ke liye rawana hote hain. Par airport jaate waqt beech raastein unki taxi kharaab ho jati hai. Tabhi us raaste se Chitrangada guzar rahi thi. Jatin ke taxi ko dhekhke ruk jaati hai. “Mr. Director, koi problem?” Jatin gaadi ke andar se bolta hai “Main aaj wapas Bambai jaa raha hun par yeh taxi kharab ho gayi hai. Meri flight do ghante mein hai…..so….” “Thik hai, tum chaho toh main tumhe apni car mein lift de sakti hun?” “Nahi thik hai…. I’ ll manage”. “Arre its ok. Come I’ll drop you to the airport”. Jatin apna samaan taxi se nikal kar Chitrangada ke car mein rakhta hai aur phir Chitrangada ke paas wali seat par bhaith jaata hai. “Thank you” Chitrangada kehti hai. “Kyun? Thank you kyun?” Jatin poochta hai. “Nahi tum Basant ki picture banana ke liye raazi ho gaye the, mujhe achi lagi woh picture. I hope janta janardhan ko picture pasand aaye”. “ Mujhe kuch farak nahi padta janta janardhan ko ye picture pasand aaye ya nahi. Maine Basant ki dosti ke wajah se banayi thi bus…..”. Tabhi traffic signal mein gaadi ruk jaati hai aur Chitrangada Jatin ke taraf dhekhti hai, Jatin bhi Chitrangada ki taraf dhekhta hai…..kai saal pehle jab Chitrangada Chief editor nahi thi aur Jatin Bambai ka film nirdaishak nahi tha tab in dono mein bahut gehri dosti thi. Keh sakte hain pyaar tha. Par dono apne jeevan se bahaut ummeedein bandhe bhaithe the. Tabhi se Jatin ko nirdishak banna tha aur Chitrangada ko journalist. Jab shaadi ki baari aayi toh shaadi ki raat Jatin kalkatte se bhaag ke bambai chala gaya tha nirdaishak banne, uske baad nah toh Chitrangada ne shaadi ki na Jatin ne. Issi beech traffic signal hari ho jati hai aur Chitrangada Jatin se nazarein hata kar samne sheeshe mein dhekhti hai…….thodi der baad airport aa jata hai. “Thanks Chitra…ngada….. aur haan aaspatal mei tumne poocha tha main Basant ke bulane par kyun nahi aaya tha. Kyunki uss raat tumhe jab maine Basant ke ghar mein ghuste hue dhekha toh main raste se wapas chala gaya aur kyun gaya tha yeh tumhe pata hai….thanks for the lift and I am sorry. Ho sake toh maaf kar dena”

EK HAFTE BAAD

Jatin dwara banayi gayi yeh Basant wali picture poore desh ke cinema gharon mein release hoti hai aur buri tarah pith jaati hai aur phir akhbaaron mein …….

MUMBAI MOVIEBLITZ DAILY

Mumbai: Late Basant Chakraborty ki kahani aur Jatin Dey dwara nirdaishit picture AKS boori tarah box office mein pitne ke baad Jatin Dey ka kehna yeh hai ki yeh picture unhone apni dost ke kehne pe banayi thi aur sirf usko dhyaan mein rakh ke. AKS picture ke flop ya hit se unko koi farak nahi padta, unhe bus iss baat ki tassali hai ki Late Basant Chakraborty ko yeh picture pasand aayi thi. Par film Critics ka maana yeh hai ki Late Basant Chakraborty ne marte marte yeh Jatin Dey se purana badala liya hai. Ek baar Jatin Dey ke picture ke chalte Late Basant Chakraborty ki picture pit gayi thi…

P.S : special thanks to ARPANA SARKAR for helping me in keeping the grammar and the genders of the characters intact in the story :)