AWARDS TOH ZAROORI HAI....

Disclaimer: Gustaakhi maaf !

CHAPTER 1
Haan ji! toh bhaiyo aur bhanno main aapka sutradhaar leke aaya hoon ek aur kahani।

Zara gaur pharmayega!

Toh ji film opens to… arre sorry main toh kahani bata raha hoon TV commercial nahi

Toh ji yeh kahani hai Satyender Dubey ki। Satyender Lucknow se Dilli aaya tha advertising firm mein naukri karne ke liye। Bachpan se hi Satyender ko chitrakaari karne ka bahaut shauk tha। Uske padosi ne uske pitaaji se kaha… ki isse art college mein bhejiye yeh aacha chitrakaari karta hai. Isme career banayega toh acha hoga. Satyender ke pitaaji ko yeh baath raas nahi aayi. Par apne bete ke paarikshaon ke parinaamo ko dhekhkar unko bhi chitrakaari mein raas aane laga.

SATYENDER: hellau…hellau… pitaaji haan pitaaji pahunch gaya hoon main, aur aaj hi job join kar liya hai.

SATYENDER KE PITAAJI: acha beta sab thik hain na… ghar dhang ka mil gaya hai na? acha kya audha mila hai wahan pe? Matlab designation kya hai?

SATYENDER: pitaaji Visualiser hoon yaahan par. Woh…

SATYENDER KE PITAAJI: kya?... hellau… kya hai liser॥ Visualiser?... hellau hellau…. Aur phone kat jaata hai.

Satyender ke pitaaji ne stabilizer suna tha, fertilizer bhi suna tha par Visualiser kya cheeze hai? Khair unse zyaada Satyendra ko pata chalne wala tha ki yeh kya balaa hai!

Din niklte gaye Satyender kaam ke maare suktha gaya. Issi beech usse ek aur nasal se pahchaan karwaya gaya. Writer ki nasal, inhe aam bhasha mein copywriter khete hain. Iss nasal ke baare mein jitna kahoon kam hai. Yeh log ad ya ishtihaar ko likhte hain ya kehlo logo ko cheeze befkoof banake kaise becha jaaye yeh sochte hain but creatively haan… isme kuch hadh tak Visualiser ka bhi haath hota hai. Par copywriteron ka baddapan keha lijiye ki saara ilzaam apne upar hi le le te hain. Woh kaise ? uske liye dusri kahani likh raha hoon main. Visualiser ka kaam kya hai yeh aaj tak mujhe bhi samaj mein nahi aaya. Itna pata hai ki yeh ishtihaar dhikne mein kaisa hoga yeh sab ko lekar hi kuch karte hain.

Toh ji din guzarte gaye Satyender bhi ab khaafi samaj gaya tha ishtihaar company mein kaam kaise hota hai. Akela bechara dilli jaise bade shehar mein bhi joojna kam nahi tha. Jahaan rehta tha wahan ke log bhi kuch ache nazar se Satyender ko nahi dhekte the. In mein unki bhi galti nahi thi, kyunki Satyender zyadatar samay chor uchakko ki tarah aadhi raat ko hi kaam se ghar ko lauta tha. Aass pados ke logo se zyada chaukidaaro se dosti ho gayi thi.

Log samajte the ki Satyander maze karke aa raha hai late night partyion mein. Par unko kya pata tha ki hamaare Satyender praaji maza karke nahi mazaa de kar office se aa rahein hain. Toh ji aise din kat te gaye aur woh art director ban gaya. Keh sakte hain promotion mil gaya hai visualiser se. thodi si aur lagegi.

SATYENDER: hellau… Haan maa main art director ban gaya hoon. Promotion mil gayi hai.

SATYENDER KI MAA: director ban gaya hai tu? Kya baat kar raha hai. Itni kam umar mein director kaise ban sakta hai. Tu koi galat kaam toh nahi kar raha hai beta?
Ab bhala Satyender kaise samajaye ki art director hai director nahi. Par maa toh maa hai bhavnao mein bhakar uske baad kuch suna hi nahi, ki Satyender kuch samjhana chahata hai. Khair choriye, din guzrate gaye Satyender bechara pilta gaya…. kaam mein. Dhekte hi dhekthe December ka mahina aa gaya tha. Aur dilli mein doh doh season bhi aagaye the. Ek Winter season aur ek AWARDS ka season. Sardiyon koh toh kisi tarah sambhaal leta par awards ka kya karen.

Satyender kaam ke bhoj ke maare apne office ke bahaar apne copywriter ke saath cigarette ki kash bhar raha tha, ki woh jeev aa gaya jisko ki advertising language mein Creative Director kehte hain. Inka kaam zyadatar creatively ungli karna hota hai. Creative director pooch baithe “aur bhai tum log awards ke liye kuch soch rahe ho. Any ideas?” Satyender sochne laga idea sochoon ya design karoon. Apne copywriter bhandhoo ko dekh kar aur apne daari pe haath pherete hue soch ne laga, saala yeh toh soch lega kyunki yeh toh har waqt aish hi karta rahta hai chaar copy liktha hai aur phir idhar udhar ghumta hai. kuch na kuch to iske khopri mein aa hi jayega. Padta bhi rahata hai kuch na kuch. Hum toh sochte bhi hain aur rango se lipa pooti karte hain kagaz par. Jisme sochna kam lipa pooti karney mein zyada time nikal jaata hai. Tabhi Creative Director ne kaha “haan bhai Satyender kaha kho gaya?.” Satyender bol pada “nahi wohi soch raha tha ki ideas sochna hai.”

Ab jyon hi woh apne copywriter ke saath awards pe sochne baithe ki postman aa jata hain. Mera matlab servicing ke logo se tha. Ye woh nasal hai jo ki agency se namak harami kartein hain, khaate hain agency ki... taraf daari client ki karte hain. Client se kaam laakar inko mera matlab creative ke logon ko kahte hain karne ke liye aur phir wapas usi kaam ko bhejte hain client ke pass. Isse jyada agar who kuch karne jaate hain toh shayad agency ko bhagwan ko hi jawab dena padta hai. Toh yeh sahibzaade aa jaate hain kaam lekar.

Toh bhai yeh karein ya awards ke liye soche. Par karna toh dono hi hain. Daal roti ka sawaal hai bhaisahaab! Phir mood banta hai ki raat ko bhaith kar madira paan hoga aur idea ka aagaamn bhi hoga. Par dil hai ki manta hi nahi. Daaru piliya par ideas ka koi ata pata nahi.

Satyender ki kismet bhi bhagwan ne badi phursat se banaya tha . Agle din jab woh subha subha office aaya toh apne boss ko dhekh kar chupne laga. Kyunki phir pooch bhaitha toh… ki ideas kahan hai?...issi beech Satyender ne shauchaalye ka raah pakda. Iss thand mein bhi khambhkhat baar baar jaana padta hai. Aur wahan pe jab woh halka ho raha tha ki Mr CD yani creative director uska boss yahan par bhi aa gaya, aur woh bhi halka hone laga.

Satyender ki taraf dhekhar bola aur award winning ideas hai kuch? Satyender ne kaha “bahaa gaye hain sir aabhi abhi ideas . bahut der tak rok ke rakha tha bahaa gaye.”CD saahab kuch bolte uske pehle woh wahan se chalta bana.

CHAPTER 2
Ab advertising mein hain aur dillagi na ho yeh toh khud advertising ki tauheen hai.Toh ji hamaare Satyender ji ko bhi ishq hua ek aur art director se. Ab sahi bhi hai, ek dusre ka dard aur kaun samjhe. Ek din Satyender ki mashooka kuch kaam ke liye apne ghar bulati hai. Inke maashooka ke pitaaji bhi advertising ke naami logo mein se ek the. Ab retire kar chuke hain. Darwaze pe khare mil jaate hain. Aur Satyender se pooch baithe hain “How many awards young man?” Satyender bol padta hai “sir one... i mean ek glass paani milega please.”

Satyender ne kabhi zindagi mein nahi socha tha ki awards uski zindagi mein itna toofan kadha kara dega. Doston ke saath daaru pine bhaithe toh awards ki baat, tv par show dhekhne bhaithe to channels par award functions, gaadi kharidne ke liye soche toh dealer bole yeh gaadi kharidiye issne yeh award jita hai. Satyender pareshaan ho gaya tha yeh awards ki baat sun sun kar. Par marta kya na karta usne bhi sochna shuru kiya awards ke liye. Ji tor mehnat ki, aur woh din aa hi gaya jab Satyender aur uske copywriter ko award mila.

Satyender pagla sa gaya tha .Kya karega pata nahi tha. Poore office mein paaglo ki tara idhr udhar bhagta raha. Iske baad kya hona tha. Chaska lag gaya award jitney ka, aur phir awards ke upar awards jita gaya Satyender. Dusre jagao se naukri ke offer bhi aaane lage. Ab woh charo tarf se bada aadmi ban gaya tha.

Do saal baad….

Ek din jab woh apne ghar pe leta hua tha toh office se phone aaya. Woh office pahunchta hai aur pata chalta hai ki jo client ka kaam hai usme kuch badhautri nahi ho rahi hai. Awards ke peeche log itne paagal hogaye the ki aam janta kis tarah ka ishtihaar samjhega isspe kissi ne dhyan nahi diya. Kyunki agar award winning ideas chaape toh zyadatar janta samaj hi na paaye. Client ko iss wajah se kaafi nuksaan ho raha tha. Satyender laakh koshish karne ke bawajood bhi us tarah ke ishtihaar nahi bana paa raha tha. Uska dimaag waise chal hi nahi raha tha.Thanks to the awards. Kya karein aab....

Advertising agency ke maalik ne kaha “ hamein koi problem nahi hai tumhare kaam karne ke tarike se par hamara target meet nahi ho raha hai. Client bhi pressure daal raha hai. Sorry but its time to say good bye to you or else we loose the client.You may be good for award stuff but not for minting money. We are sorry! Hamein awards se clients mil to rahein hain goodwill par, but unka basic needs hum pura nahi kar pa rahein hain.”

Satyender kya karta ? Uska lifestyle ka kya hoga, jo woh itne din se ji raha tha. Naukri nahi hai uske paas. Usne bahaut koshish kiya par kahin naukri nahi mili. Kyunki woh jis level par pahunch gaya tha us level par naukri milna mushkil bhi tha. Kya karein ab woh. Din bitte gaye Satyender ka haalath kharaab hona shuru ho gaya. Jitna bank mein paisa tha woh idhar udhar ke khrache mein nikal jata . credit cards ke bills, telephone ke bills….kya karein ab woh?

Ek din aise hi baitha hua tha ki achanak usse apne jite hue awards ki yaad aayi. Woh bhag kar gaya aur apne almaari se jo awards ki trophyan thi nikaali. Aur agle pal hi unko le jakar dukaan mein bech aaya aur uss paise ko haath mein lekar lambi saans bharte hue bola Awards toh zaroori hai....